Page 24 - solo

Pagina 24 Diamars 6 Mei 2015

Solo Local......

Rey Willem-Alexander a bishita Cas di Gobernador

Den e bishita di un dia cu
Rey Willem-Alexander
a realisa na Aruba den
compania di su esposa
Reina Máxima, Minister
di Asuntonan di Interior
Ronald Plasterk y
Presidente Comision
Celebracion 200 aña
di Reino Ank Bijleveld,
a incorpora tambe un
bishita na e Cas di
Gobernador, unda cu e
trabounan di renobacion
y restauracion ta
practicamente cla.

Na yegada di e Pareha
Real, tabatin un multitud
di hende sperando
riba L.G. Smith Blvd,
dilanti e Bahia di
Gobernador unda cu
tabatin competencia di
boto miniatura organisa
riba e dia aki. Varios
Grupo di Scout a dorna
e entrada pa e Pareha
Real pasa nan dilanti
prome cu drenta e
Cas di Gobernador.
Reina Máxima a ricibi
un bunita areglo floral
for di un mucha muher
chikito. E delegacion a
keda basta rato paden
unda cu a admira
e beyeza di Cas di
Gobernador.

Por a nota e amor cu
habitantenan di Aruba
tin pa Famia Real,
acudiendo na cantidad
grandi for di oranan
tempran di mainta,
sea riba L.G. Smith
Blvd pa ricibi nan of
den haf di Oranjestad,
unda cu nan a haya un
splicacion di loke tabata
tumando luga eyriba.

Rey Willem-Alexander
y su esposa Reina
Máxima a ricibi
invitacion di Gobernador
sr. Fredis Refunjol,
representante di Rey
na Aruba, pa realiza
apertura di Sail Aruba.
E evento aki a wordo
organiza den cuadro di
200 aña di existencia di
Reino Hulandes y 350
aña di Marina Real.