Page 12 - saffer02

EK STUUR VIR

JOU SOMER

Elke jaar hierdie tyd vergader die swaeltjies hier vir hulle
lang trek na ‘n warmer klimaat. Hierdie jaar was nie ‘n
uitsondering nie. Sondagaand, 2 Februarie, het duisende
swaeltjies reg bo ons kompleks in die lug rondgeswalk. Dit
het gelyk soos ‘n groot bewegende massa. Klein lyfies wat
dán links en dán regs gedraai, en op en neergeduik het. Ons
het hulle dopgehou totdat hulle skielik in die diep skemer
soos ‘n swart wolk neergedaal het op die boomryke area net
langs ons kompleks. Om oor te slaap vir die nag. Dit was
ongelukkig reeds te donker om foto’s te neem met my idiot
proof kameratjie. Die volgende oggend moes hulle baie vroeg
reeds vertrek het, want toe ons seweuur see toe geloop het,
was daar geen teken meer van hulle nie. Hierdie jaar het
hulle darem in goeie weer gevlieg – die reën het vandag eers
uitgesak.

Die foto’s hierbo het ons geneem – ook op 2 Februarie, maar
in 2015, die eerste jaar toe ons hier aangekom het. Die reën
het toe dae lank reeds by die emmersvol neergesak. Honderde
klein voëltjies het druipnat en bedremmeld op ons traliedeure
en vensterbanke gesit en vol verwagting by die woonstel se
vensters ingestaar. Hulle moes so koud gekry het. Boonop
was daar ‘n klompie valke wat ook rondgesweef het op soek
na ‘n vinnige maaltyd. Die swaeltjies het daarvandaan ook
douvoordag die volgende oggend vertrek. Daardie jaar het
ons darem ‘n paar foto’s gekry.

Besoek vir Hester by https://www.hesterleynel.co.za/ of
https://twitter.com/HesterLeyNel

| 12