Page 60 - AHATA

Minister Otmar Oduber a expresa cu ta duidelijk cu tin un diferencia di opinion grandi
entre e miembronan di KvK.

E mandatario a duna di conoce cu e mes a tuma contacto cu sr. Ernst Mohamed, ken a

notifike cu e no tabata sa di e comunicado di prensa cu a sali publica y cu sigur nan a
uza su potret sin su autorizacion.

E dignatario a acentua cu e no ta bay mete den problemanan cu tin den Camara di

Comercio; esey ta keda nan mes pa atende entre su miembronan, pero di otro banda
si, e ta haya straño y e kier cu KvK splica esaki mihor, pasobra awor nan ta contradeci
locual nan ta bisa den e carta cu e minister a ricibi di e organizacion aki, dia 13 di
September despues cu nan a reuni.

KvK a indica cu nan ta compronde e punto di bista di e mandatario pa paga pa
recogemento di sushi y hacie di manera separa y esey ta loke nan ta purba contradeci
awor.

E minister a referi na e reunion di 13 di September den cual el a yega na un
entendimento cu tur sindicato, incluyendo FTA y OPPA, y nan a bay di acuerdo cu
mester cobra pa recogemento di sushi.

Minister Oduber a agrega cu locual KvK no ta bisa ta cu KvK a wordo bisa cu no
solamente tin cu carga responsabilidad pero comercio, cu ta produci gran parti di e
sushi, tambe mester por contribui na e maneho di recogemento di sushi, mescos cu e

hotelnan.

KvK a bisa cu si, cu nan tambe mester contribui pa loke ta trata maneho di sushi, pero
pa no cobra e comerciantenan sino pa bin cu otro belasting pa cobra e pueblo atrobe.

Esey ta loke nan no a bisa cu nan a skirbi den e carta, segun e mandatario a subraya.

“Nos a bisa nan cu pa nos esey no ta aceptable. Si comunidad ta paga, comerciante ta

paga. Kico ta e diferencia cu tin? Gobierno a bisa e comerciante pa e paga tambe su 25
florin pa luna normal, y 35 pa companianan grandi. Nan ta bisa nos pa no cobra nan
pasobra si no, nan tin cu sake for di nan fondo, pero hinke den un belasting na porta
pasobra e ora ey e pueblo mes ta pague den e prijs”, e mandatario a indica.