Page 100 - AVP

Dos aña na mando ainda su Gobierno no por mustra algo cu nan a haci pa enseñansa cu
no ta di crea conflicto y problema continuo cu maestronan pa su Minister Rudy Lampe.

Na lugar cu Vrolijk lanta para y atende cu su Minister riba e desaroyonan negativo cu e ta
ocasionando, e ta prefera di bay atende cu maneho di un Gobierno di AVP, cu a inverti
tanto den educacion di nos pais.

Tin otro dicho cu ta bisa cu ‘ta miho keda keto y mustra bobo, cu habri boca pa tur hende
haya sa cu en realidad bo ta bobo,’ loke mi ta kere ta aplicabel pa Parlamentario Vrolijk
aki.

Si el a pone su mes na altura di tur loke Gobierno di AVP a haci den 8 aña pa educacion
na Aruba, e lo a haya sa cu 80 miyon florin Gabinete Mike Eman I y II a inverti den
enseñansa pa drecha e desaster cu su partido MEP a laga atras na 2009.

Es mas, Edgard Vrolijk tabata maestro di scol na Cacique Macuarima prome cu el a
drenta Parlamento cu ta un skol cu bou di Gobierno di AVP a conoce un renobacion
grandi, caminda a cambia bentana- y portanan, drecha baño y construi e cura di skol y a
pone airco p’e skol como prome fase di e proyecto di renobacion.

E di dos etapa di e renobacion mester a wordo ehecuta bou di e actual Gobierno di MEP,
Gobierno di Edgard Vrolijk, pero caminda simplemente esaki no a tuma lugar y na lugar
di hunga pa bobo como politico, ta bon bo persona puntra e Gabinete di bo lider, di con
esaki no ta tumando lugar.

Ta bon pa Edgard laga e maniobranan di shishi aki un banda y haci su trabou como
Parlamentario puntra su Gobierno ta kico nan a haci cu 100 miyon florin cu nan a gasta
adicional manera CFT ta bisa, pero ningun debchi a bay pa educacion.

Ora cu bo no kier mira bo no ta mira, pero pa haci politica barata Edgard Vrolijk t’e
payaso di mas grandi cu por tin ya cu si e busca informacion adecuado, e lo haya sa cu
Zigi College ta un MAVO School na Noord cu despues tin cu wordo transforma den un
HAVO, loke no por a tuma luga den tempo di AVP, pa motibo cu no tabatin suficiente
maestro pa duna lesnan necesario riba e nivel aki.