Page 100 - MIN ECEM

Watty Vos Blvd cla den 30 luna y ta
costa riba 170 miyon

Posted on 05/15/2017 5:36 pm AST | Updated on 05/15/2017 5:38 pm AST

ORANJESTAD – E proyecto di ringweg 3, conoci como PPP Watty Vos, lo keda
completa aki 30 luna (augustus 2019) y lo tin un costo di 180 miyon florin total.
Durante un conferencia di prensa dialuna, DOW a trece dilanti detayenan di e
proyecto. E proyecto ta parti den 4 fase, y lo no mester crea dolor di cabez di trafico
manera cu ta sosodiendo awor cu Green Corridor. Por lo menos, segun director di
DOW Marlon Croes. E intencion ta pa traha di tal forma cu lo por traha paralelo cu
algun fase, mientras cu otronan lo ta individual.

E FASENAN

E prome parti ta esun cu a inicia diasabra cu e kortamento di mata. Aki ta papia di un
trabou di 2 luna y mei, pero cu no mester stroba ningun trafico ya cu lo ta trahando banda
di caminda, creando dos via extra, mientras cu e caminda actual di rotonde airport te na e
cruzada di Codemsa, ta keda habri normal pa trafico. Despues lo tin e fasenan cu ta sigui,
cu ta e ‘green field’, tereno habri di San Barbola pa LG Smith, sigui pa Sasaki pa
Hospital. Entre nan lo traha simultaneamente riba e trottoirnan y tambe e structura di
concrete. E parti final y mas dificil ta bay ta e interconeccion na Caya Ernesto Petronia,
debi na e fluho di trafico. Aki ta spera poco reto, pero por surpasa nan.