Page 33 - ATA

ORANJESTAD (AAN) – Diabierna mainta trahadornan di Douane encabeza pa e lider di
Sindicato SADA sr. Edward Maduro, tabata tin un accion despues cu nan no a haya oido
di gobierno, den e lucha pa adaptacion di salario cu nan ta hibando pa varios luna caba.

Maduro a duna di conoce na prensa, cu e miembronan a exigi un reunion di e sindicato,
despues cu SADA a pidi un encuentro cu Minister Presidente, Minister di Finanzas, DRH
y Mediador di Gobierno.

E sindicato a pone como fecha dia 22 di Augustus pa merdia, pero esaki no a
concretiza. SADA a haya un mail di Minister Presidente, cu su agenda ta hopi yen y e no
por sinta cune e dianan aki, y cu e laga Minister di Finanzas y Minister di Husticia reuni
cu e sindicato, pero tampoco nan a haya fecha pa esaki.

E miembronan di SADA masalmente a mustra cu nan a fada di warda y cu nan kier un
fecha concreto pa e ehecucion di e ahustacion di salario, y nan a exigi pa nan pidi
audiencia cu Minister Presidente na Bestuurskantoor.

Edward Maduro ta kere cu tur esaki por a wordo evita si e ministernan a sinta cu nan
na mesa. El a menciona cu ningun momento gobierno a mustra cu e situacion
financiero ta impedi e adaptacion di salario. El a señala cu hasta gobierno a regla un

fondo pa esaki aña pasa, pero lamentablemente e concretizacion pa loke ta trata e
aspecto huridico no a finaliza.

E sindicato y miembronan a bay te Bestuurskantoor pa wak si Minister Presidente lo por

a atende nan, y yama un reunion e dia aki mes, pasobra e miembronan a cansa di
warda.

E lider di SADA a subraya cu esaki por a wordo evita pa no haci un accion asina den

oranan di trabao, pero nan a haya obliga di hacie pasobra pa lunanan largo nan ta
pidiendo reunion, y no ta compronde pakico semper tin algo cu ta stroba, ora nan a
kere cu tur cos ta cla, y nan a spera di haya un clarificacion.

Na Bestuurskantoor Minister Presidente no por a baha atende cu nan, pero si Minister di
Finanzas mr. Xiomara Ruiz Maduro hunto cu Minister mr. Andin Bikker, y despues e
sindicalista a subi bay na e kantoor, y nan a keda di informa despues con e reunion a
bay, kico a logra of kico lo ta e siguiente pasonan si no a yega na nada.