Page 53 - MIN ECEM

Na caminda pa Debate Electoral 2017: KVK ta lansa un
encuesta online pa partidonan por participa na debate

Monday, 03 April 2017 17:03
Comparti

Entrante dialuna 3 di april 2017 Camara di Comercio y Industria di Aruba (KvK) lo publica un encuesta online cu lo
ta disponibel via su website www.arubachamber.com. Via e encuesta Aruba por vocifera cua ta e partidonan politico
cu nan lo kier mira presente durante e debatenan.

Manera KvK a indica den un comunicado di prensa dia 10 di maart ultimo, KvK a invita e lider di e partidonan cu ta
den Parlamento di Aruba pa forma parti di e debatenan. A base di un encuesta online lo scohe cua lo bira e otro
partidonan politico cu KvK tin e honor di invita pa participa na e debatenan.
Partidonan politico mester a entrega nan programa/manifiesto di eleccion como exigencia pa participa na e
encuesta. Di e forma aki pueblo di Aruba por haya mas informacion kico lo ta e plan cu cada partido ta ofrece si nan
drenta Parlamento despues di eleccion.

A base di e punto di salida cu KvK a stipula pa participacion na e debatenan, ta pone cu partidonan AVP, MEP y POR
por pasa pa participa na e debatenan. Mediante di e encuesta lo saca e otro 3 partidonan cu lo participa entre UPP,
RED, PPA, MAS y ABO.

E encuesta online lo ta disponibel desde su lansamento te cu dia 18 di april 2017. E debatenan lo tuma luga dia 8 di
juni 2017 y 17 di augustus 2017. E debatenan lo wordo transmiti en bibo via TeleAruba. Publico presente lo tin e
oportunidad pa haci pregunta y esnan cu ta sigui e transmision via TeleAruba lo por manda email of mensahe via
Facebook durante e debatenan.