Page 34 - MIN ARENDS

Polisnan cu tabata presente a duna un presentacion riba e ultimo investigacion y
tendencianan riba atraconan di anja 2016 y 2017. Nos tin cu remarca cu medionan di
comunicacion mester ta cauteloso ora ta publica den nan media pa no ta
sensacionalista riba e preocupacion aki di atraco pasobra por danja nomber di Aruba
internationalmente y por sembra panico den nos comunidad. Nos tur ta conciente cu tin
un fenomeno di atraco riba nos isla pero no cu nos isla ta manera Jamaica por
ehempel. Esey mester ta cla den esaki. A hanja informacion for di polis cu te awor
januari 2017 a registra 12 atraco y februari 2 atraco. Anja pasa 2016 tabatin un cantidad
di mas Arubianonan 20 cu a comete atraconan na Aruba, despues a sigi
Venezolanonan 14, Corsow 2, Dom.Rep. 1 y Colombiano 1. Esaki a shift den e anja aki
di 2017 pa mas tanto Venezolanonan. Anja pasa 2016 e atraconan a tuma lugar mas
tanto den districtonan Noord, Sanicolaas y Sta Cruz.

Den pasado Cuerpo Policial a confronta nan mes cu atracadornan profesional cu ta bin
dal negoshinan, esaki a shift pa atraconan den casnan di bario y riba individuonan riba
caya. E tendencia ta atraco di impulso dus bai rapido y sali rapido bek. Lo ta bon pa
cuidadanonan tene cuenta cu e atracadornan aki no tin miedo di wordo reconoci. Nan
ta habla hispano, Nan ta comete e atraco sin cara tapa y nan ta satisfecho cu loke nan
encontra. Esey kiermeen nan ta drenta e cas exigi apuntando e arma tur loke tin di
balor y nan ta sali bai. E identidad di e Venezolanonan aki ta hopi biaha dificil pa
“traceer” ja cu nan ta drenta y sali rapido di Aruba y e “pakkans” e chance pa garanan
ta bira un reto grandi pa polis. E mas tristo ta cu nos propio localnan ta e facilitador di e
atracadornan. Nos propio hendenan ta cuminsa pa para garantia pa e Venezolanonan,
nos propio hendenan ta duna e Venezolanonan aki dak riba nan cabez, informacion y
transporte y esaki ta di lamenta. E Venezolanonan no por haci nada na Aruba si no tin
hende ta judanan. Y mester recorda cu complicidad ta castigabel pa ley. Peso di ley
mester baha pisa riba nos hendenan cu ta juda/facilita e atracadornan aki comete nan
fechoria riba nos isla.