Page 2 - MIN ON

Cu orguyo KIA ta

anuncia graduacion di

ocho hoben instalateur

Published on April 6, 2017 in Local
ORANJESTAD, Aruba

Coriente no ta cos pa hunga cune. Un fout por causa un disaster, un candela, of hasta
costa bida di hende. Esaki ta puntonan cu ta wordo subraya durante di henter e curso di
instalateur cu ta wordo ofreci na hobennan deteni den KIA cu ta scoge pa busca un
profesion nobo y un carera leu for di crimen. Recientemente, cu alegria y orguyo, e
team encarga cu e curso aki, cu a cuminsa na october 2016, tabata testigo di e
prestacion excepcional di e ocho alumnonan cu a haci nan examen y a slaag. E control
estricto di nan instalacion a wordo haci pa expertonan di Dienst Technische Inspecties.

E curso a cuminsa cu 24 alumno, pero ta ocho a sigui ten a final. E deseo ta pa e
otronan cu no a sigui, como cu nan a expresa e deseo original di siña un profesion
nobo, ta inspira pa toch scoge pa cuminsa e curso atrobe den e proximo tanda, of
scoge pa un otro curso cu por yuda nan descubri un talento of pasion pa haci cierto
trabaonan positivo cu ta contribui na un carera positivo. E cursistanan tabata hopi
nervioso, nan a haci bon trabao, y a cumpli tambe cu nan deseo, esta di logra nan
diploma, nan Docente Salazar a bisa cu orguyo. E oportunidad cu nan a haya den KIA
ta uno cu nan no tabata hayando pafo, el a agrega. Nan a inverti 180 ora den e curso.

E resultado mas grandi ta e logronan di e graduadonan despues cu nan bay cas.
Salazar ta agrega cu e experiencia ta cu hopi biaha e graduadonan di e curso aki no ta
bolbe KIA mas, como cu e conocemento cu nan a adkiri y e diploma ta yuda nan haya
trabao. E ta yuda tambe cu comunidad ta wak cu tin balor den loke e graduado aki ta
haci, y ta dun’e un oportunidad pa traha y pa e crece den su trabao, segun e docente ta
splica. KIA ta gradici tur persona y instancia cu a contribui y ta contribui na e educacion
di e detenidonan. Pa cu e curso di instalateur a conta cu apoyo di DTI, Edwin Kock,
Lucho Geerman, Instalateur Miriam Croes, EPB, Meneer Tromp, y di Chido Henriquez y
Maduro di Enseñansa pa Empleo. E docente a expresa e deseo di pa den futuro por
conta cu contribucionnan di companianan manera WEB, y companianan cu ta bende
material pa haci instalacion, pa por amplia e lesnan y tin tur e materialnan necesario. Ta
pone hopi enfasis riba e parti di traha cu cuidao, responsabilidad y atencion pa detaye,
nan ta pasa un examen y evaluacion estricto pa nan logra e diploma; e “papel” aki ta
algo cu cada persona a traha duro p’e. Masha pabien na tur graduado.