Page 6 - MIN ON

PROYECTO DI CUERPO POLICIAL Y

IMELDAHOF CU BISHITA DI GREGORY

MILLIARD

April 6, 2017 adminarubanative Uncategorized Leave a comment

Gregory Milliard ta un bringado profesional den e deporte di Mixed Martial Arts
(MMA) kende ta cosechando exitonan grandi internacionalmente, y pa subraya e
topico disciplina cerca e muchanan di Imeldahof, Cuerpo Policial a invita e atleta
pa un bishita special cerca e muchanan.
For di algun tempo caba, un grupo di miembro di Cuerpo Policial, lidera pa
Vocero di Polis, esta Lito Lacle a simbolicamente adopta e muchanan di
Imeldahof den un proyecto bunita estilo di “Big Brother” y “Big Sister”. Nan ta
bishita e hobennan, ta brinda nan guia como tambe ta motiva nan pa scoge un
rumbo positivo den tur loke nan kier haci y logra den nan bida.
Lito Lacle ta splica cu e bishita di Milliard tabata den cuadro di un serie di
encuentronan cu personanan cu ta “role model” den e comunidad, kende ta
contribui na inspira e hobennan riba diferente topico. Milliard specificamente a
“highlight” e topico disciplina. El a splica e hobennan con e prome etapa di su
carera no a logra pa falta di disciplina, pero awo cu disciplina entre otro pa train
tres biaha pa dia e ta sumamente exitoso riba nivel di prestacion mundialmente
den su deporte.
Lacle a agrega cu tin algun di e muchanan cu ta haci un deporte similar na MMA,
y ta bon pa hinca den nan cabez cu si nan kier ta exitoso den bida esaki ta
posibel, y nan por logra cu e disciplina necesario.
Durante di su bishita, Gregory Milliard a expresa cu e ta contento cu e encuentro
cu e muchanan, e acogida tabata hopi bon, y e lo kier purba bishita Imeldahof
mas pa trece conscientisacion y duna apoyo na e hobennan.
El a remarca cu algun di e hobennan tabata conoce caba como cu el a bishita
nan scol. Como un toke special na e encuentro, Milliard a invita dos hoben pa,
hunto cu Lacle y Liliana Rasmijn di Cuerpo Policial, ta su invitadonan na e pelea
grandi pa un titulo internacional cu ta tumando luga na Aruba riba dia 28 di april.
E dos muchanan aki ta wordo scogi door di Imeldahof basa riba con bon nan a
haci nan best pa demostra bon conducta y bon prestacion na scol.