Page 38 - MIN SOC

Metacorp a celebra cambio di aña 2016-2017

Monday, 02 January 2017 19:24
Comparti

Cu e tradicional pagara y bou ritmo di Dande, empleadonan di e companianan subsidiario di MetaCorp
a celebra fin di un otro aña.
A topa na e oficina di MetaCorp situa net banda di ATCO Concrete Products na Barcadera, unda tabatin
algo di come y bebe pa tur presente. E tres ehecutivonan na cabes di MetaCorp a cende e pagara
hunto, den presencia di accionistanan, gerente di e companianan, empleadonan y algun invitado.

Prome cu cende e pagara, cu e aña aki a bay compaña pa awasero, e C.E.O. di compania, Eddie de Veer,
a expresa palabra di gradicimento na tur e empleadonan di tur e companianan cu hunto a percura pa e
companianan sigui crece. El a reconoce cu e aña no tabata facil y a bin cu retonan, pero e
determinacion y compromiso di cada un di e empleadonan a haci cu e surpasa tur reto y a comberti tur
den oportunidadnan. A brinda hunto pa un bon cambio di aña y cu e speransa cu aña 2017 lo ta miho
ainda pa nos pais, pa e companianan y pa e pueblo general.

MetaCorp ta existi desde aña 1920 caba den negoshi di cine. Cu apertura di Lago a cuminsa cu E. De
Veer Transport cu awendia yama ATCO cu despues a expande tambe den ATCO Concrete Products y
Ecotech. Despues di segunda guera mundial a cumpra e planta di Coca Cola y asina a inicia Tropical
Bottling, cu na caminda a expande tambe den Brouwerij Nacional Balashi.

MetaCorp ta e empresa comercial mas bieu na Aruba y pronto ta cumpli 100 aña. Cu un fundeshi
solido, cu un cultura di compania basa riba principionan di inversionnan duradero y kere den
empleadonan, MetaCorp awendia ta cla pa e siguiente 100 añanan di progreso, cu talentonan manera
Eddie de Veer, Robert Carrasquero y Guus Slabbekoorn na cabes di e compania.