Page 13 - HOH

A base di preocupacionnan expresa na DIARIO, informacion a wordo busca pa por a
presenta publicacion na Aruba cu awor ta reacciona y ta confirma e necesidad grandi pa
e sector di cuido medico bira prioridad na Aruba.

Presupuesto pa cuido medico pa basta tempo mester tabata un di e ehercicionan mas
importante cu gobernacion mester a eherce y e accento no mester tabata dirigi
continuamente na e necesidad con ta alimenta AZV.

DIARIO ta den contacto estrecho cu informantenan cu ta mustra cu actualmente
gobierno nobo mester tuma pasonan cu a wordo neglisha ora a bay hinca capitalnan
den e edificio di hospital y a sigui sondea formanan pa tene AZV na bida na luga di
investiga si e comunidad di Aruba por sostene un seguro monopolista y socialista

manera AZV.

E placa cu Arubianonan y tur inscribi na AZV mester hinca den e seguro ta representa
un suma halto mientras cu indirectamente placanan di belasting tambe ta bay pa tene e

seguro, cu a bira central den mundo medico, na bida.

“Calidad di cuido medico ta midi su mes riba e grado cu poblacion ta sinti su mes
comodo cu cuido medico loke no ta e caso,” informantenan a confirma na DIARIO.

Reaccionnan ricibi riba articulonan publica a pone DIARIO busca mas informacion riba e
validez di e reclamonan.

A wordo indica cu rond mundo tin problema cu necesidad pa amplia cuido medico a
base di edad di poblacion. Pero no mester sconde tras di e crecemento di poblacion cu
mester ta parti di planificacion.

“E crecemento di cantidad di pashentnan na Aruba y e necesidad pa mas cuido a nifica
tambe crecemento di fondonan pa AZV debi na su structura di participacion,” a wordo
mustra.

Ta evidente cu e reclamonan cerca pueblo ta valido. Un persona cu tin sintomanan di
cancer, mester por haya tratamento urgente. A wordo mustra cu na paisnan desaroya
tin normanan cuanto tempo un pashent mester warda pa haya un cita.