Page 51 - KPA 28 JAN 2017

No ta permiti staciona riba acera rond di Carnival Village

Friday, 27 January 2017 23:25
Comparti

Recientemente a caba di embeyece henter e area rond di Carnival Village na San Nicolas, den cual a instala
klinkers tur rond. Den e siguiente dianan lo tuma luga varios evento carnavalesco eyden,

manera ta festival di calypso y roadmarch infantil, hubenil y pa adulto. Ta spera un publico grandi, mescos
tambe concentracion di auto.

Cuerpo Policial Aruba ta adverti adelanta cu no ta permiti pa staciona riba acera, specialmente rond di Carnival
Village unda recientemente a caba di pone klinker. A dialoga cu e organisacion MUSICA cu mester percura pa
opcionnan di parkeer auto pa e publico grandi cu lo atende. Nan a sigura autoridadnan cu tin suficiente espacio
tur rond pa staciona vehiculonan di motor.

Ta pa esey Polis ta manda un advertencia pa publico, cu lo takel tur auto mal staciona y cu e consecuencia ta pa
e doño di auto, cu lo mester paga pa e servicio di takelwagen y sin lubida e multa cu ta bin separa.

Cuerpo Policial ta probecha pa corda tur esunnan cu lo atende e eventonan, cu e maneho di "Faya bo Haya" lo ta
aplicabel y den esey lo haci listramento preventivo. Esaki ta pa por garantisa siguridad di tur cu lo atende e
eventonan aki. Ta mas cu claro cu pa por gosa carnaval, no mester cana ni cu arma ni cu ningun tipo di droga,
pasobra esey lo ta problema pa hinca Bo den problema cu husticia. Y corda cu ora bay mira carnaval, no ta
kapsalon tin, pues no mester bay cu sker den saco. Polisnan regularmente ta topa hende cu sker scondi den
saco, cu por uza como arma den un pelea.

Pa evita cu no ta haya un bon luga pa parkeer ora bay evento den Carnival Village, ta conseha pa bay trempan
pa sigura un bon luga, nechi den parkeerplaats of den un luga asigna den vecindario cu NO ta riba acera!