Page 11 - BNDIA ARUBA

A11
opinion Diaranson 19 september 2018

Jeroen Heuvel:

Curasonchi

ORANJESTAD - Mare, mare mi tabata… Cuanto biaha hende grandi
y chikito no a desea esaki. Di tal manera, hopi cuenta a origina. Awor
ta bay publica un obra ilustra fantasticamente y cu hopi dedicacion
tocante un curason cu yama Curasonchi, cu ta anhela pa ta tur sobra
organo menos cu su mes. Mare e por ta wowo, pasobra nan por mira
tur detaye. Anto tin tanto cos bunita riba mundo pa mira! Ma wowo
ta descubri cos mahos tambe y wowo mester cera sosega gran parti
di dia. No, algo otro anto. Mare e por ta man, pasobra man por traha
drecha mundo y yuda otro. Ma tambe tin man cu ke horta so of caba
cu mundo. No, preferiblemente anto…

Cuent'i ada di anhelo, tin den tur tamaño y lenga: E mito Griego di rey Midas
cu horea di burico; Piscado cu djinn, for di Mil-y-un-Anochi; cuenta Afri-
cano, Asiatico, indjan; E pisca magico 'Piggelmee'di e rumannan Grimm y
hopi variacion mas.

No a crea e cuent'i adanan aki pa taha hende pa concretisa nan gran soño. Nan
sabiduria ta cu bo mester keda realistico y luci dentro di bo posibilidad nan.
Ademas nan ta siña bo di ta bon consciente di ken bo ta y kico ta bo don, y
uza e talento ey pa bienestar general, pa un dia realisa e deseo inherente di tur
hende: amor incondicional pa tur co-creatura.

Lo mas profundo netamente ta cu Curasonchi a bira consciente di e calidad
di otro organo, pa medio di experencia nan, e ta balora e otro organonan pa
nan merito. Na otro banda el a siña sinti miho su mes calidad y por empeña
esaki pa henter mundo. Por compara esaki cu hopi otro caso. N' ta asina cu
solamente den un curpa tur organo tin cu coopera pa sostene alma cu spirito,
cu a haya vivienda den e curpa ey, pa funciona mas miho posibel. No. Tambe
den cada team, empresa y pais, individuo mester desaroya nan donnan maxi-
malmente pa laga e totalidad funciona zeta. Figura bo cu tur miembro di un
banda ke ta e vocalista, of e drummer. Esta laf, lo no tin harmonia, ni papia di
muziek mes. Of cu riba barco tur tripulante ke ta capitan so, ken lo ta na timon
e ora ey? Cuanto bal un curpa si tur organo ke ta curason, of al contrario, niun
hende kier t'e.

Den cuadro di Dia Internacional di Curason, fin di e luna aki, proximamente
lo sali un buki cu e cuent'i ada di un curason cu ta anhela pa ta otro organo pa
mustra implicitamente con importante cada organo ta, pues incluso curason.
Levi Silvanie, conoci entre otro como musico, ta co- autor di e cuenta basa
riba su cantica popular 'Djis mi mes', hunto cu Rosabelle Illes cu ta conoci
entre otro como poeta y artista presentado. Den e buki bo ta haya e cuent'i ada
aki cinco biaha: na Papiamento, Papiamentu, Ingles, Spaño y Hulandes, cada
biaha ilustra cu mas o menos trinta arte plastico di Jowy Maasdamme. Facil-
mente por haya informacion di e tres artistanan aki riba internet.
Cumpra e obra aki, les'e duro pa e chikitinnan: recomenda di curason!