Page 44 - KPA

Bisiña Fatima Orman contento cu finalmente a haya rotonde

Thursday, 15 December 2016 19:33
Comparti

Sra. Fatima Orman tabata entre e habitante di Madiki cu diahuebs mainta tabata presente pa reapertura
di caminda riba Santa Helenastraat. Es mas, e tabata un di e promenan sinta pafo di su cura ta warda e
momento yega. Ta un momento cu el a warda riba dje pa no menos cu 26 aña largo y finalmente ta wak
con Gabinete Mike Eman II si a haci su deseo un realidad.

“Mi ta contento paso e ta un bunita rotonde, ta e chofer di autonan mester comporta y core mane hende y
no core mane bestia,” Sra. Orman ta comenta bisando acerca cu e ta spera cu henter pueblo di Aruba y e
bario en special di Madiki disfruta di e rotonde. “E ta un alivio grandi pasobra dilanti di mi cas tabatin
‘free for all’, e ta splica. E crusada di Santa Helenastraat y Driemasterstraat ta conoci como uno fastioso
pa crusa, tanto pa auto, como pa peatonnan. Sra. Orman a yega di perde un mascota dor di trafico. Pa su
persona mes tabata un sorpresa ora cu e trabounan a cuminsa, pero el a bira hopi contento di tende cu ta
rotonde ta bay construi. E ta corda con a yega di haci e peticion hopi aña atras, mas o menos 26 aña pasa,
tempo cu el a muda pa prome biaha den e bario y tabatin varios accident na e crusada. Sra. Orman ta
gradici Prome Minister Mike Eman y sigur tambe Minister Sevinger pa e trabou haci cu ta bay haci un
diferencia grandi no solamente riba e fluho di trafico y seguridad di e peatonnan, pero tambe den e
ambiente di e bario. E ta desea nan pa sigui cu e bon trabou.