Page 4 - Djaluna 12 november 2018.pdf

4 Djaluna 12 Novèmber 2018
Minister-presidente Rhuggenaath:

‘No tin niun proposishon

pa subi impuesto di sushi’

Ta reakshoná riba notisia riba ret sosial

WILLEMSTAD.-
Minister-presidente Eugene
Rhuggenaath a ninga
rumornan ku gobièrnu ta
plania pa oumentá impuesto
di sushi. Segun Rhuggenaath
e no ta na altura di niun
proposishon di gobièrnu
pa oumentá tarifa di sushi.
Rhuggenaath ta reakshoná
riba notisia ku ta saliendo
riba ret sosial tokante Selikor
ku supuestamente no ta paga
penshun di trahadónan na
APNA, ni primanan retené
for di salario di trahadónan
na nan Seguro Médiko i pa
kolmo ta operá e kompania
sin paga Koriente i Telefòn.
Segun e notisia gobièrnu
Rhuggenaath ta pensando pa
subi e impuesto na 40 florin.
Manera ta konosí gobièrnu

ta paga Selikor pa kue sushi,
ku e impuesto ku pueblo
tin ku paga. Rhuggenaath
a ninga ku ta na altura di
algun plan pa oumentá e
impuesto. Uniko kos ku el
a bisa EXTRA ku gobièrnu
tabatin intenshon pa wak si
e tarifa tin ku wòrdu indeksá,
pa motibu ku e tarifa pa
hopi aña ta na mesun nivel.
EXTRA a purba di tuma
kontakto ku direktor di
Selikor pa haña kontesta riba
e diferente notisia ku ta riba
retnan sosial, pero direktor
di e kompania no a duna
kontesta ayera na EXTRA.
Resientemente a bin kla
ku gobièrnu a tuma medida
pa kòrta ku 5 porshento den
e pago mensual na Selikor.
Pa mitigá e falta di entrada
Selikor a stòp di traha ku entre
20 pa 25 “uitzendkracht” i
a re-aloká personal di otro
departamentonan atrobe
pa por kumpli ku servisio
pa rekohé sushi. Selikor
ta den Kòmbersashon ku
ministerionan di Salubridat
Públiko i Finansa riba e
problemanan di likides ku e
ta konfrontá debí na e medida
di kòrta 5 porshento den pago
mensual ku e kompania ta
risibí.