Page 34 - MIN VOS 27 MAY 2017

Politiconan tin cu scucha y realis’e

“Como hoben politico, hopi biaha hende ta cuestiona nos caracter, nos capacidad y
abilidad pa por haci e trabou sumamente importante di representa un pueblo. Esaki ta di
compronde.

Nos ta hoben, menos experiencia y nos ta drenta un mundo cu ta nobo pa nos. P’esey ta
hopi importante pa pueblo sa pakico bo ta drenta política”, segun Clayton Croes.

“Den mi caso, m’a drenta politica pa diferente motibo. E motibonan mas importante ta e
amor pa mi isla y e realidad cu nos hobennan ta e futuro di nos pais. P’esey nan mester
tin un voz mas fuerte y directo den fiha futuro di nan pais.

Mi ta convenci cu e generacion nobo na Aruba tin e capacidad y e boluntad, pa surpasa
tur expectativa cu tin y hiba nos pais na un nivel cu nunca antes el a logra yega.

Mi ta convenci cu e generacion hoben di Aruba, cu ta profesional y capacita, kier y por
crea un Aruba unda e colornan di cada partido nunca ta mas importante cu loke nos haci
pa e bienestar di cada ciudadano”, Clayton Croes ta splica.

E hoben candidato ta sigui splica cu, “E unico manera pa por nos yega na esaki, ta dor di
caba cu e politica di acusacionnan falso y atakenan personal y riba famia. Ami ta kere
den un politica y debate politico unda nos por duna otro critica constructivo, unda e meta
no ta pa rebaha un otro politico, sino pa trece e necesidadnan di e pueblo dilanti y busca
solucionnan nobo pa nan. Asina nos por traha p’e pueblo cu un perspectiva nobo.

Pa nos por sirbi pueblo bon, nos mester scucha pueblo bon. Nos hendenan ta hendenan
motiva, hendenan cu ta traha duro, cu ta respeta otro, cu ta uni y mas cu tur, nan ta
orguyoso di nan pais.

E ta keda na nos como representante y lidernan di pueblo, pa demostra e mesun
cualidadnan di nos hendenan.”

Pueblo ta pidi pa un politica nobo. Pueblo ta pidi tambe pa un manera nobo di core
campaña.