Page 37 - MIN VOS 27 MAY 2017

Vision pa deporte lo ta presenta durante seminario deportivo

Friday, 26 May 2017 19:15
Comparti

Diasabra awo lo tin un seminario di deporte organisa pa Minister di Salud Publico, Cuido di Nos
Grandinan y Deporte, dr. Carlos Alex Schwengle y su team. “Deporte na Aruba ta algo un tiki complica,
pero politicamente tambe. E no ta e sector cu ta miho organisa pero si ta unda cu tin hopi hende cu a haci
bon trabou, tin hopi boluntario y hopi di nan a y ta haci trabounan bunita.

Hopi biaha organisacionnan ta haci cosnan riba nan mes y ta pesey ta importante pa structura y traha
hunto. Mi sa cu gabinete Mike Eman 1 a traha duro caba pa reorganisa mas miho posibel, cierto aspecto
mi ta di acuerdo, cierto aspecto mester sigui mehora”, Minister Schwengle a remarca. Ministerio di
Deporte ta sigui cu e reorganisacion aki y awo a bira tempo pa demostra pueblo en general, pero sigur
mundo deportivo aki na Aruba, kico tur e trabounan cu tin andando y kico falta. Tambe pa duna nan un
splicacion ta dicon Ministerio di Deporte kier mas unidad den e mundo deportivo. Aki na Aruba tin tur e
materialnan pa deporte, hendenan cu boluntad, cu curason pa deporte, tin hopi. Tin suficiente placa y ta
bay haya mas placa. Tambe tin facilidadnan cu tabata falta di atencion, a demostra cu ta bezig cu
renobacion di tur y esaki ta bay gradualmente, pasobra no por haci tur cos un solo biaha. “Nos tin tur
ingrediente pa hiba deporte na un nivel mas halto unda cu dado momento lo bo kier mira cu tur mucha,
nos hubentud ta haci algo den deporte of movecion aki na Aruba”, Minister Schwengle a expresa. Na e
momentonan aki, ni un kwart di e muchanan no ta [participa activamente den deporte y esaki pa
Minister Schwengle ta algo casi criminal. Minister Schwengle no por imagina cu e partnernan di deporte
cu ta ASU, COA, IBiSA, Lotto, FMA, FFD, Comision Subsidio cu dia 1 di juni proximo lo bira fundacion di
gobierno, hunto cu federacionnan, cu nan no por traha tiki tempo riba diasabra pa sinta hunto den e
seminario.

Aki Minister Schwengle lo tuma e oportunidad di presenta e vision pa deporte pe venidero 10 aña. Tambe
lo presenta un codigo di bon gobernacion den deporte, di cual e ta un proposicion. Por hinca e cosnan aki
den ley, pero e cos di mas importante ta cu e pueblo mester carg’e. “Pasobra ora bin cu un cos den ley y
pueblo no ta carg’e, kere mi, nada lo bay pasa”, Minister Schwengle a remarca. Loke cu Ministerio di
Deporte a yega na dje como conclusion hunto cu e partnernan ta pa bay cana tur hunto den un solo
direccion. Esaki ta un cos cu a falta hopi den deporte pa añanan largo. No tabatin e vision y compromiso
di tur partner den Deporte. A yega e momento y nan ta leu y no ta cos cu e partnernan no sa di e
documentonan, pasobra nan sa di dje. Minister hunto cu e partnernan a skirbi e documentonan, kiermen
e documentonan ta di nan tambe. “Loke cu nos kier concretisa e diasabra aki ta pa demostra e
federacionnan cua ta e rumbo cu nos ta bayendo. Nos kier firma un intentie verklaring, unda cu tur
federacion y organisacion lo bisa ‘si minister esaki ta e direccion cu nos kier bay’”, Minister Schwengle a
remarca. Si cada 4 aña ta bolter e mundo, no lo logra nada. Eficiencia pa logra algo pa deporte ta bira
menos. “Un palabra di danki di awo pa ful e mundo deportivo pa nan bon trabou y mi ta kere cu nos por
logra mas. Mi ta invita nan y reta nan pa nan bin reta ami tambe e diasabra binidero pa nos por hiba un
debate y pa nos por mehora e futuro di deporte pa nos muchanan”, asina Minister Schwengle a expresa.