Page 9 - CMB
P. 9
CIBC FIRST CARIBBEAN
PROME PA ENTREGA BIYETE
NOBO DI FLORIN
5 June, 2019, 7:00 am
CIBC First Caribbean situa na Tanki Flip tabata e prome banco cu tabata cla pa cuminsa
entrega e biyetenan di Florin nobo na su clientenan. E Hefe local Giovanni Atencio den
combersacion cu 24ora.com , na prome luga a felicita Aruba cu un biyete cu no
solamente ta bunita pero cu tambe ta contene hopi elemento di siguridad.
Mescos cu otro banconan, ehecutivonan di CIBC First Caribbean tambe a participa den
sesionnan organisa door di Banco Central di Aruba, cu a duna informacion di creacion di
e biyete nobo cu a dura 7 aña pa e ta completamente cla pa wordo imprimi y poni den
circulacion. “Awe nos hendenan tin un bunita biyete den nan man, y uno hopi sigur
tambe,” Atencio a bisa.
Internamente nan a bin ta trahando riba e adaptacionnan pa e tamaño nobo, cu a nifica cu
nan mester a haci cambio na e mashinnan di ATM pero tambe e aparato cu ta conta
biyetenan. Tur e cambionan a wordo haci door di vendors (for di kende nan ta busca e
mashinnan). Mester a haci varios test pa mira cu e adaptacionnan ta bay funciona tambe
ora cu e biyetenan drenta den circulacion.
