Page 49 - HOH
P. 49
Manera e sistema legal ta poni aworaki, SOGA ta doño di e compleho di Hospital, y pais
Aruba ta bay huur e compleho aki for di SOGA. Stichting Ziekenverpleging Aruba (SZV)
lo bay tuma esaki den uso.
E contratista OHL/Arellano tin contract directo firma cu SOGA.
Durante un conferencia di prensa convoca Dialuna atardi, pa prome biaha OHL/Arellano
a reuni cu prensa, y den linea grandi a splica cu nan no ta culpable pa e inundacion di
awa den weekend cu a pasa na Hospital nobo. Pues ta pusha e culpa den scochi di
otro.
Jeff Shaheen, kende ta manager di OHL/Arellano na Aruba, a indica cu ta tuberinanan
di goot cu tabata geplok na diferente lugar, a pone cu tubonan a kibra y e inundacion a
socede den area di Servicio di Emergencia. Pero hecho ta cu e tuberianan aki NO ta
forma parti di e proyecto nobo. E tuberianan ta existente, y ta tira culpa riba gerencia
di HOH Hospital pa neglisha esaki.
Prensa a puntra Sr. Shaheen encuanto loke Fundacion SOGA a declara algun ora
prome. Pero e no kier a comenta riba loke SOGA a bisa.
E contratista a mustra claramente cu e tuberianan existente di goot pa awacero tabata
completamente geplok. Pues e culpa ta cay riba Maintenance di Hospital mes.
Pa Shaheen, esaki no tabata un sorpresa completamente. Pasobra esaki no prome
biaha cu e contratista OHL/Arellano a conseha Hospital cu nan mester haci
maintenance. A avisa riba e tubonan geplok como tres siman pasa.
El a bisa cu OHL/Arellano tin reunion semanal cu Hospital, y nan a wordo adverti riba e
tuberianan aki. Segun Jeff Shaheen, den su 30 aña di experiencia, nunca el a mira algo
asina, esta e reaccion y acusacionnan falso den nan direccion.
Manera ta conoci, hasta Sindicato ABV di enfermeronan a cuestiona e trabao di e
contratista.
