Page 24 - VOS JAN 31

Director Tecnico di SV Dakota, David Abdul: Mi ta asina orguyoso di e team aki pasobra e ganado
absoluto ta Dakota

31 January, 20170

Despues di un schedule pisa e final di e wega di futbol mas galadorna na Aruba, Copa Betico Croes a
tuma luga riba 25 di Januari den Stadion Guillermo Prospero Trinidad. Arubaanse Voetbal Bond (AVB) a
prepara un final sin igual pa tur e fananticonan di futbol local cuminsando cu un tremendo mercado di
purga unda cu un y tur por a pasa saborea platonan dushi y hopi mas, sigui den anochi cu e gran final di
Copa Betico Croes.

Despues di 90 minuut di un wega increiblemente exitante entre SV Britania y SV Dakota e di prome a
resulta campeon absoluto di e campeonato y SV Dakota a keda sub-Campeon.

Director Tecnico di SV Dakota, David Abdul a splica cu e preparacionnan pa e final aki tabata hopi bon.
“E muchanan a sinti nan mes profesional pa un dia. For di 10’or di mainta nos a bin hunto na club. Nos a
haci un rondtrip den bus cu airco, ‘chill out’ un tiki. Despues nos a bay Centro Deportivo Frans Figaroa y
nos a come hunto. E team a bay sosega pa tres ora ariba den e cambernan sigui pa un rato di
palabracion y djey a subi bus direccion pa stadion.”

Appie Abdul a sigui bisa cu por a nota con bon e muchanan a desplega riba veld dunando tur loke nan
tin… “nos por djis complimentnan pasobra nan a duna tur cos di nan banda. Britania a bay cu e copa
pero Dakota a bay cu e miho futbol y mi ta orguyoso di esey.”

E entrenado a sigui bisa cu “Den futbol tin dos diferente cos: En berdad mi kier gana e copa pero di otro
banda mi ta asina orguyoso di e team aki pasobra e ganado absoluto di awe ta Dakota,” el a agrega.

“E wega aki tabata uno hopi importante. Nos a drenta e wega pa gana pasobra un final bo no ta hunga
pa keda na di dos luga sino pa sali campeon y mi ta kere cu despues di 90 minuut nos por ta hopi
orguyoso di team Dakota. E manera cu nos a hunga, e manera cu nos a para riba tereno y sigur cu si e ta
un orguyo y ganado di awenochi ta e team dimi,” el a accentua.