Page 52 - ARUBA BANK 21 APRIL 2017

Prome Minister Mike Eman: Expansion di Hospital a hiba
departamento SEH di 7 te na 17 sala di emergencia

Thursday, 20 April 2017 18:12
Comparti

Un di e puntonan mas resaltante y sigur satisfactorio for di e recorido cu Minister President Mike Eman a
realisa e siman aki den e di dos edificio nobo di hospital, ta e area di SEH (Spoedeisende Hulp). Un bes
cu mas persona, sea profesional di sector medico of publico cuminsa conoce e facilidadnan nobo, lo
ripara e cambio drastico y positivo cu e departamento aki ta bay conoce pronto.

Pa Premier Eman, esaki ta otro anhelo di pueblo cu Gabinete Mike Eman I y II ta cumpli cune; elevando
asina e calidad di bida di e ciudadano Arubiano. “Hopi bes, algo cu nos ta tende for di comunidad, ta cu
hopi biaha tin momentonan largo di espera ora bo yega na un sala di emeregencia. Tin bes, cu hopi
inkietud bo ta warda pa wordo yuda pasobra bo no sa kico realmente tin cu bo salud y cada minuut bou
di e condicionnan ey ta minuutnan doloroso y ansioso,” Prome Minister a conta pafo di e edificio nobo di
Dr. Horacio Oduber Hospital, indicando acerca cu “E salanan cu nos ta bay tin akinan ta 17. Nos no ta
papiando ni di un redoblacion, pero di casi un triplificacion di e cantidad di sala di emergencia pa asina
por acomoda mas pashent y cu un servicio hopi mas rapido pa esnan cu yega sala di emergencia.” Esaki
ta un concepto cu e prome mandatario di Pais Aruba ta brasa cu hopi entusiasmo ya cu e departamento
di SEH ta entre un di esnan mas crucial den henter un hospital. For di tempo cu Dr. Horacio Oduber
Hospital a cuminsa ricibi su prome pashentnan exactamente 40 aña pasa, e structura y su capacidad no a
conoce un cambio y mehoracion considerabel manera ta sosodiendo awo. Expansion di Hospital hunto
cu Green Corridor, Watty Vos Boulevard (Ringweg 3) y Waf nobo di Carga na Barcadera ta e proyectonan
mas grandi di infrastructura cu Gobierno di Aruba a saca for di un status di ‘stand by’ pa finalmente haci
nan un realidad pa progreso y bienestar di pueblo en general. Ademas di e salanan adicional di
emergencia, henter e personal di e departamento aki di hospital ta pasando dor di un proceso di
preparacion y recapacitacion pa asina adapta facilmente na e luga y hermentnan nobo di trabou, como
tambe pa pone e calidad di servicio na e mesun nivel halto cu e edificio caminda pronto nan ta bay traha.