Page 36 - AHATA

Durante fin di siman nos a sigui studia tur e documentonan cu a bini riba mesa riba
medidanan cu Gobierno mester tuma pa atende cu e gastonan grandi di e pais.

Con cu kier bolter e problematico grandi cu tin riba mesa, ta bolbe na un solo punto

den exigencianan di Hulanda. Mester reduci gastonan di personal di gobierno.

Uno di e documentonan cu nos a bolbe repasa ta e carta cu e Ministro di Financia a
ricibi di e comision di supervision financiero CAFT na inicio di September 2019. E carta

aki tabata e contesta di e comision riba e rapport di e Ministro Arubano encuanto
maneho cu actualmente ta wordo hiba.

Aki por nota claramente con enfasis ta wordo poni riba reduccion di gastonan di

personal. Esaki ta nifica resultadonan directo pa e personal di gobierno, cu ta bira
victima directo di e crisis cu a wordo crea pa Aruba.

Ta masha facil pa gobierno anterior y e grupo cu ta sostene awe splica cu gobierno

actual no mester tarda pa tuma medida.

E pregunta ta, pakico mester tuma medida awe? Pakico awe mester kita beneficionan di
trahadonan di gobierno, cu politiconan hopi bes a pone na trabou pa beneficio politico?

E pregunta grandi ta, pakico gobierno anterior cu a deshaci di entrada di Aruba dor di
kita BBO, no a tuma e medidanan cu Conseho Social Economico a trece dilanti den
rapport di 2014 y cu por a evita e desaster humanitario cu Aruba conoce awe.

Cada persona cu perde trabou den e situacion actual na Aruba ta un peso mas pa e pais
pero tambe un tragedia humano den un situacion economico cu e fracaso di Citgo a
laga atras.

Berdad mester wordo papia. E aparato gubernamental ta un herment politico cu awe ta
dal pueblo den su cara. Nombramento politico ta basa riba e hecho cu ta duna hende
trabou pa haya voto. Trabou pa cual pueblo mester paga.

Ora tin placa na cantidad, pueblo por paga. Pero ora kita entrada di e pais manera a
pasa cu reduccion di BBO na 2010, pueblo no tin placa pa paga.