Page 16 - RDA 24 JAN 2017

Prome Minister Mike Eman ta hopi satisfecho cu e rapport cu el a haya

riba progreso di e investigacion cu TNO ta haci pa loke ta e proyecto pa conecta e refineria na algo
cu ta unico na mundo: emision di carbon ta wordo capta pa cultiva algen. E reunion cu TNO y
diferente stakeholder a tuma luga siman pasa diahuebs na sede di Gobierno. Aunke un proyecto
asina a wordo proba caba y ta cientificamente posibel, sinembargo no tin un laboratorio di e indole
aki nan, esta den estilo industrial. E proyecto aki ta basa riba un acuerdo cu a yega na dje cu
CITGO pa crea un proceso unda ta capta e emision di carbon pa cultiva algen cual cu despues ta
wordo uza pa diferente proposito comercial.
Prome Minister Eman ta cataloga e proyecto aki no solamente como algo sumamente importante,
pero tambe unico y nobo. “Pa Aruba desaroya un proceso asina ta nifica pa nos mes cu ta bay
capta parti di e carbon cu ta sali for di e refineria loke ta cuadra cu nos pensamento di un refineria
berde. Pero na mesun momento henter mundo ta bay mira con esaki ta posibel, apesar cu den e
proximo 100 añanan lo sigui bay tin procesonan cu ta keda emiti carbon. Pa e añanan aki ta
importante pa crea procesonan cu ta recoge e carbon aki. Riba e tereno aki no tin hopi desaroyo
ainda na mundo. Tin aplicacion cu nan ta hinca carbon bou di tera, pero nan ta hopi discuti. Pa bini
cu e proyecto di algen, unda bida ta cuminsa, y cu lo hiba na algo nobo ta algo hopi unico. Pa Aruba
mustra cu esaki ta posibel, hunto cu institutonan manera TNO, ta algo hopi grandi,” Prome Minister
Eman cu hopi orguyo a bisa.
Awor t’asina leu cu henter e proceso a wordo poni riba papel, incluyendo tur e fasenan cu mester
pasa aden pa yega na ehecucion di e proyecto y e forma con ta bay lag'e funciona. “E ta un “pilot
project” na nivel industrial.” E trabounan probablemente lo bay ta mesun momento den ehecucion
cu rehabilitacion di e refineria cuminsa. Esaki ta nifica cu denter di 18 luna ora cu e refineria
cuminsa su operacion, por cuminsa capta parti di e carbon pa cuminsa cu e cultivo di algen. E por
nifica un solucion importante pa tur e dañonan cu e emision di carbon ta haci. “Si esaki wordo
concipia na Aruba, bo por imagina bo mes kico e impacto pa e reputacion di Aruba lo ta?”