Page 7 - WEB

MFA Paradera lo haya su parkeo y e area rond di dje ta wordo

embeyeci

Publication: Thursday, 19 January 2017. Categoria: General

ORANJESTAD (AAN): Oficina di MFA a duna di conoce e
siman aki cu e di dos fase di construccion di MFA Paradera ta bay inicia den luna di februari proximo.
E parti aki ta consisti di cuater proyecto chikito cu ta mehora e facilidadnan pafo rond di e facilidad multifuncional. Un
bes cla, usuarionan lo disfruta di un nivel ainda mas halto di calidad di servicio.
Omar Harms, di management team di MFA a splica cu cuater proyecto ta inclui un muraya banda pariba di e edificio
cu ta crea un division entre e edificio y e stal di cabay banda di dje. Tambe tin ponemento di asfalt y trottoir riba e
caminda di acceso na MFA for di caminda grandi di Paradera.
Parti patras ta bay construi un parkeerplaats den estilo di aeropuerto, esta cu solar panels como dak cu ta bay
genera e electricidad pa e edificio y sobra pa bay riba e red nacional. Parti dilanti ta bay realisa un embeyecemento
di e tereno grandi pa medio di klinkers, banki pa sinta, baki di mata y luz publico.
“Asina e ta keda mas nechi y cu otro hende por use tambe pa sinta ora nan ta cana aki of pa warda pafo hasta si
nan ta desea esey,” asina Harms a indica bisando cu tur ta aspectonan di e plan original di e proyecto MFA Paradera,
pero a duna prioridad pa e edificio keda cla prome y cuminsa duna su servicio na comunidad.
E necesidad pa iluminacion ta algo cu e klankbordgroep of ‘Bos di Paradera’ a trece dilanti y como un punto hopi
valido, cu no por a mira prome cu construccion, ekipo di MFA ta hink’e den e trabaonan di e di dos fase. “E ta cosnan
cu ta bon cu bo ta haya ‘feedback’ di e klankbordgroep,” Harms a bisa.
E mesun contratista local cu tabata encarga cu e prome fase, esta BIC, ta responsabel pa e ehecucion di e di dos
fase. E volgorde entre e cuater proyecto ta worde determina actualmente teniendo cuenta cu logistica. Ta sinta na
mesa cu WEB Aruba N.V. cu ta bay realisa e parti di panelnan solar. Probablemente lo cuminsa di patras bin dilanti.