Page 42 - ATA

Den cuadro di tur e informacion ricibi, e mandatario a bisa cu den e reunion di Conseho
di Minister di diabierna, e lo pidi permiso pa instala un comision, cu lo mester evalua ual
ta e siguiente paso pa dal, basa riba tur e informacionnan cu tin. E comision mester bini
cu proposicionnan riba futuro di e refineroa, si e lo bira un Aruba cu refineria of un
Aruba sin refineria.

Tambe e mandatario a bisa cu tanten cu e situacion existente na Venezuela keda asina,
cualkier interesado pa operacion di e refineria lo por haya nan mes cu problema di e
sancionnan. Loke cu tin den e refineria y cu por bay wordo opera, ta un “upgrader” cu
por procesa unicamente crudo pisa. E material aki mas cerca disponibel ta esun di
Venezuela. Si Aruba mes dicidi di drecha e refineria oper’e y cu e unico crudo pisa
disponibel ta di Venezuela, “nos lo bay cay bou di e sancionnan. Pues no por haci nada.
Cu esaki mi kier mustra con serio e situacion ta awor.”

E comision lo mester bay studia si den region por tin otro pais cu e tipo di crudo pisa aki.
St Croix tabata den un situacion similar na Aruba, na aña 2012, pero nan a haci cambio y
nan ta cla pa habri awo, y a logra haya crudo di hasta China. Pues esaki ta mustra cu tin
speransa y posibilidad.

Tambe e comision ta bay evalua e lista di esnan cu den pasado a expresa interes den e
instalacionnan di e refineria. Lo mester haya sa cual ta e modelo cu nan tin den mente,
pasobra si ta di Venezuela, e lo no por bay door. Lo no bay duna mas garantia na ningun
compania interesa. Lo pidi e comision pa den dos luna di tempo bini cu
recomendacionnan pa Gobierno. Cu esaki lo bay den un consulta nacional pa presenta e
posibilidadnan na comunidad.

E mandatario a bisa cu e situacion ta dificil. “Esaki ta momentonan hopi dificil. Nos ta
den lucha pa crea pilar y desaroyonan economico pa crea cuponan di trabou. P’esey tipo
di noticianan asina ta dificil pa procesa. Mester wak cuanto mas nos por wanta. E
refineria debi hopi miyones na contratistanan local, cu na su turno ta afecta e trahadonan.

Cu tur informacion ricibi lo bay evalua esaki cu CITGO, e comision pa mira kico ta bay
haci. E mandatario a bisa tambe cu ora ta papia di refineria ta papia di Plan A, B y C. El
a bisa cu Plan ta cu CITGO ainda riba papel, pero esaki ta algo cu e mandatario ta kere cu
poco-poco mester kit’e for di mesa. Plan B ta e refineria pero cu un otro operador of di un
otro forma. Esaki ta loke cu Gobierno ta bay cuminsa traha riba dje cu e comision ta bay
instala. Si den Plan B resulta cu e unico crudo cu Aruba por procesa ta esun pisa di
Venezuela, lo bolbe bek pa splica comunidad kico Gobierno kier haci. Si resulta cu no
kier warda, lo bay haci algo diferente. E pregunta ta si kier warda y cuanto tempo kier
warda. “Unico cos cu por bisa ta cu e capitulo di CITGO ta yegando su final.”