Page 5 - HOH_Neat
P. 5
16 AWEMainta Diamars, 14 Augustus 2018
Comision di abuso di mucha di Hospital cu iniciativa pa atende e problematica
Congreso “Shatter the Silence” den luna di October
DR. Horacio E. Oduber Hospital lo ta organisando pa prome
biaha riba dia 19 y 20 di October proximo un congreso titula
"Shatter the Silence" . E iniciativa aki a nace cerca e team di
Comision abuso di mucha di Hospital mirando e cifranan
alarmante durante ultimo añanan di sospecho of casonan di
muchanan abusa. E congreso aki ta pa tur profesional den e
veld cu ta duna guia y cuido na mucha, specialmente tambe
esunnan atendiendo muchanan abusa.
E congreso manera menciona lo tuma luga durante dos
dia na Renaissance Convention Center. E prome dia lo
ta workshops cu titulonan manera “Behandelmethodes
naar aanleiding van kindermishandeling” y “Signalering
kindermishandeling. E di dos dia lo trata temanan manera
“Gedrag en trauma”, “Wat als je niet veilig thuis bent”,
“Documenteren kindermishandeling” y mucho mas. Algun
di e profesionalnan cu lo t’ey presente pa duna lectura
ta entre otro dr. Louise Rafael- Croes, Pediatra na HOH,
Psicologo di Stichting Respaldo den perosna di dr. Misha
Raymond, Psikiatra di Mucha y hoben esta dr. Paul Reijnen,
Representante di Ministerio Publico, representante di Bureau
Sostenemi y mucho mas.
Hopi biaha nos ta tende kico ta pasando internacionalmente
pa loke ta abuso di mucha y loke e congreso "Shatter the
Silence" ta bay enfoca completamente riba dje ta loke ta
pasado riba nos isla mes, con pa señala y cua caminda mester
cana pa yuda e mucha como "caregivers" local. Por pensa
riba entre otro e maestronan cu ta atacando problemanan
di abuso di mucha na scol, personal di asuntonan social,
trahadonan social y tur otro persona cu ta traha cu mucha.
E iniciativa aki a start na momento cu a mira e necesidad
di comparti informacion general cu e comision di abuso
di mucha di Hospital a genera durante añanan di kico
ta sosodiendo den e veld na e momentonan aki y kico ta
haciendo pa abuso di mucha, asina Dr. Louise Rafael-Croes,
Pediatra di Hospital, a duna di conoce.
Aki na Aruba a haci hopi cos bon, asina Dr. Rafael-Croes a
duna di conoce. E idea di e congreso aki ta pa mustra kico
ta bayendo bon y e canalnan cu tin caba pa cana tanto den
tereno social, tereno medico y huridico. Ainda tin cosnan cu
falta y e comision kier sa kico tur tin haci caba, pero tambe
kico ta e puntonan cardinal unda por haya un mehoracion
den e sistema aki. Tin diferente estudio haci na Aruba pa
por yuda nan mes y tambe por haci mas. Cu e estudio aki e
comision di abuso por mira kico tur por haci pa asina e abuso
di mucha no keda un problema asina grave of ta acapara e
problema net mucho laat, e dokter a duna di conoce.
No perde e oportunidad di forma parti di e prome congreso
local organisa pa local riba e tereno di abuso di mucha. Pa
mas informacion tocante e programa di e congreso por subi
Facebook di Hospital di Aruba of website di Nashko. Tambe
por tuma contacto cu Geraldine Tromp na 597-4668 of por
manda un e-mail na Ge.Tromp@arubahospital.com.
