Page 58 - ATA

Rapportnan cu instancianan oficial presenta, mester haya e importancia cu nan merece
y mester sirbi como base di informacion comprendibel pero corecto na Pueblo.

Na varios ocasion, nos a adverti Aruba pa e situacion mundial cu awe ta haya

confirmacion den desaroyonan cu ta sigui otro pero cu lamentablemente no ta presente
den e pelea politico local.

E cifranan di Banco Central pa e ultimo tres lunanan di 2018 di economia di Aruba, ta

contene tambe e berdad di nos situacion mundial cu na e momentonan aki ta motibo di
preocupacion.

Ayera nos a informa di e crisis cu a surgi na bolsa di balor na New York debi na

informacionnan tocante un recesion grandi. Na e bolsa di balor na New York, negoshi ta
wordo haci cu propiedadnan y biennan. E ta e centro di compra y benta di propiedad na
nivel mundial.

Ora informacion cu ta indica caida di economia, pues recesion a drenta, doñonan di
propiedad (balornan) a cuminsa bende pa loco y e balor a cay cu 800 punto cu ta
sumamente halto. Otro centronan di cambio di balornan na mundo a sigui y mientras e
situacion tabata normalisa na Merca, mundo a keda den suspenso.

Den e relato di Banco Central di Aruba, alarma ta wordo bati pa problemanan cu
economia mundial ta confronta, manera DIARIO a bini ta propaga pa basta dia.

Ta importante pa Aruba ta na haltura pasobra ora economia mundial cay, Aruba ta den
problema serio.

No ta solamente turismo ta den problema, pero henter economia di Aruba si e situacion

na varios parti di mundo sigui encera menos resultado positivo.

Informacion di un pueblo ta importante y sigur pa Aruba cu ta depende completamente
di mundo hasta pa e come.

DIARIO ta cumpli cu su deber y ta mustra riba e necesidad pa tur gremio y tur
participante activo den e comunidad, cuminsa guia Aruba y duna informacion corecto
pa asina hunto por yega na solucionnan cu e pais mester prome ta laat.