Page 5 - DESPA

Concepto di ‘in/out patient’ ta nifica

mas structura pa Hospital

BY: LOOP NEWS
07:12, April 26, 2017

24 VIEWS

Valentino Phillip ta splica un aspecto nobo den nos futuro Hospital

Diariamente Hospital ta ricibi bishita di varios persona, sea nan ta pashent cu ta admiti den Hospital
of nan ta bin pa haci un test, cita cerca specialista of otro motibo manera bishita nan ser keri. Un
concepto nobo despues cu renoba Hospital y muda den e toren nobo lo ta cu lo separa e pasada
logistico pa loke ta bishitante y pashent. Sr. Valentino “Andy” Phillip, Zorgmanager na departamento
Snijdend 4 na Hospital ta splica cu e sistema aki lo brinda mas privacidad y siguridad pe pashent y
alabes siguridad pa famia y miembro di personal.

Tambe e ta duna un aspecto mas structura cu ta trece trankilidad pa famia ora di bishita nan ser
keri. Ademas di esaki, e personal tambe ta haci nan trabou mas agradabel sin mester stroba e
bishitante y/of pashent door cu logisticamente esaki lo ta separa for di otro. Esey ta un concepto cu
por mira diariamente den hospitalnan tur parti di mundo cu ora bay hospital e ta algo hopi mas
trankil y no caotico manera por mira diariamente na Hospital di Aruba actualmente. “Esey lo ta un
adelanto pa nos Hospital den futuro.

Tambe awendia bo ta ripara cu ora cu un compania yega Hospital pa haci algun mantencion of trece
productonan esaki ta pasa den e mesun gangnan cu bishitante y pashentnan. Den futuro eseynan lo
ta separa di otro, kiermen un ruta apart p’e hendenan, bishitantenan, personal, y pashentnan cu ta
den hospital, tur lo ta separa”, asina Valentino Phillip a remarca. Pa sr. Phillip kende ta un manager
riba piso ta remarca cu esey lo bay nifica cu e por haci su trabou mas trankil y cu mas control
mientras e pashentnan ta mas sigur.

“E cambionan aki ta nifica pa mi como manager, cu nos por brinda un calidad di servicio hopi mas
halto na nos pashentnan y alabes nos bishitantenan cu ta bin pa haci uzo di nos servicionan
policlinico. Nos por brinda mas siguridad y tambe e privacidad cu semper Hospital a boga pa su
pashentnan, lo keda manteni”, asina Phillip a remarca.