Page 7 - DESPA

P’esey ta bay sigui cu e campañanan aki tur aña pa conscientisa pueblo cu nan
tin un rol importante. Claro cu Gobierno tin su rol, organisacionnan manera ATA
y AHATA tambe tin nan rol, pero un di e partnernan hopi importante pa yuda
controla y kisas elimina e problema di e vector Aedes aegypti cu ta transmiti no
solamente Zika, pero tambe Chikungunya y Dengue, ta pueblo mes, cu ta hunga
un rol esencial den esaki.

“Y ta na nos mesun beneficio, e no ta bay pa e turista so. Ta importante pa tene
e turista sano, pa ora e yega nos isla, pasa un tempo ameno, sin bira malo dj’ey
pe bay cas bek y lo haci propaganda pa Aruba”, Minister Schwengle a remarca.

Pero ta importante pa pueblo no bira malo y un di miho maneranan pa haci esey
ta prevencion. Prevencion ta tene den cas limpi, tene rond di cas limpi sin
criadero, controla tur luga cu por tin awa para.

Tambe si mira rond den bisindario cu cosnan no ta bon, tin yen sushedad ilegal,
avisa Gobierno entre otro City Inspector, DOW, Serlimar y lo percura pa deshaci
di e sushinan.

Ta importante pa keda bisa pueblo kico ta pasando corectamente.

“Mi ta kere e parti preventivo di bisa pueblo di kico ta e situacion y esey nos a
haci awe y nos lo keda hacie. Kico ta Zika, kico ta Chikungunya etc. Kico ta e
sintomanan y bo mester meld”, Minister Schwengle a remarca.

Ta importante pe tur docter cu atende pashent malo, pa raporta na
Departamento di Salud, mestyer remarca si cu a nota cu e cantidad di melding
for di e profesionalnan di salud ta subiendo si compara cu 5 pa 10 aña pasa.