Page 42 - SJA

Minister di Labor, drs. Paul Croes ta felicita tur hende
muhe di Aruba Boso contribucion na famia, sociedad y
pais ta balioso y merece un recompensa husto

Tuesday, 07 March 2017 19:36
Comparti

Di e diferente dianan cu nos ta celebra den luna di maart aki na Aruba, 8 di Maart ta uno special y cu
mi ta contento di wak cu ta creciendo. Dia International di Hende Muhe ta un fecha den cual e
genero ta uni forsa y ingenio pa avansa den tur tereno necesario, mientras cu e otro mita di e
poblacion mundial ta bira mas consciente di nan aporte general; y di e reconocemento y respet cu
nan merece pa esaki.

Como Minister di Asuntonan Social, Labor y Hubentud, mi kier a felicita di e manera mas profundo
y sincero, tur hende muhe di Aruba riba nan dia. E organisacion mundial cu ta celebra e dia aki a
scoge como tema pa 2017, ‘Be Bold For Change.’ Curashi ta algo cu atrabes di historia, hende muhe a
demostra di tin. Na un nivel mas personal, mi por bisa cu mi ta yiu di un hende muhe cu a inculca
den mi e balornan di ta miembro di un famia y di ta miembro di un comunidad. Mi ta ruman di dos
hende muhe profesional cu ta duna mi tur di e ehempel di dedicacion y perseverancia; mi ta casa di
un hende muhe cu a siña mi di e poder di amor incondicional; y mi tata di un yiu muhe cu ta yena mi
curason di energia y speransa. Esaki, adicional na e profesionalnan femenino cu ta forma parti di mi
personal na Ministerio, di tur esnan cu ta lidera fundacionnan na Aruba y mi tin e placer di traha cu
nan, di tur trahado y boluntarionan cu mi tin e placer di conoce; ta laga mi para keto y bolbe realisa
pa di tantisimo biaha cu, en berdad, nos mundo ta uno hopi miho hende muhe ta riba dje. A pesar di
tur nan aporte balioso, e Foro Economico Mundial ta calcula cu desigualdad salarial no lo disparce te
na aña 2.186. Naturalmente, esey no ta un idea cu nos por biba cune. Mi ta apoya tur esfuerso haci
rond mundo pa caba cu e situacion inhusto aki y, mas cu claro, na Aruba na prome luga. E tema di
Nacionnan Uni pa Dia International di Hende Muhe ta enfoca riba “Hende Muhe den un Mundo
Laboral cu ta Cambia: Planeta 50-50 pa 2010.”

Globalisacion y innovacionnan tecnologico banda di cambio climatico y crisisnan economico y social
ta entre e factornan, cu ta sigui transforma nos mundo laboral. Nan ta ofrece tanto reto, como tambe
oportunidadnan pa realisa e potencial economico di hende muho den un miho futuro. Estadistica
global ta mustra cu awendia 61.5% di hende muhe tin un profesion di servicio, 13.5% ta labora den
industria y 25% ta den e sector di agricultura. Pa loke ta trata hende muhe na un posicion di
liderasgo, e ser femenino ta representa awendia 23% di asientonan den Parlamento di nan pais, pero
apenas 4% di e CEO di e 500 companianan mas grandi na mundo. Aunke e cifranan local por vari
mas den un categoria, cu otro, nos tin hopi trabou pa haci ainda. Mi ta compromete mi mes na haci
loke ta necesario pa Aruba, ademas di cumpli cu su meta di sostenibilidad den 2020, tambe nos por
ta entre e prome paisnan na mundo pa elimina e desigualda laboral y salarial den 2030.