Page 6 - KPA

A detene 3 sospechoso mas den caso di soborno y
falsificacion di permiso di trabou/estadia

Wednesday, 31 May 2017 07:56
Comparti

Despues cu diamars dia 16 di mei ultimo a detene Juancho Filiciana di "Charity Consultancy", sospecha
di "actieve ambtelijke omkoping" den e casi "Ibis", awe autoridadnan encarga cu e investigacion a efectua
3 detencion mas.

Ta trata aki di e señoranan Aleida Vasquez, naci na Colombia, Martha Jimenez-Montoya naci na
Colombia y e Arubiano Chelito Schwengle, cu tabata of ta casa cu un di e dos damanan ariba menciona.
Hunto nan ta maneha e compania Bashaka Enterprizes, conoci pa regla permiso pa stranheronan y ta
por lo menos un di e companianan intermediario cu tabatin masha "suerte" pa logra un cantidad di
"Ontheffing" pa su clientenan. Bashaka Enterprizes no ta un desconoci pa autoridadnan, pasobra no ta
mucho tempo pasa caba cu a gare den un falsificacion di documento pa pidi permiso di trabou/estadia pa
stranhero. E tempo ey el a core "trek in" su peticion pero ya caba Gobierno a entrega keho contra nan pa
falsificacion.

Den e caso awo, Ministerio Publico ta acusa Chelito Schwengle di complice di soborno (omkoping),
mientras cu e dos damanan ta sospecha nan di ta complice den falsificacion. E caso aki diripiente a haya
forma y Husticia ta bayendo tras di tur esunnan cu a of ta haci nan mes culpabel na corupcion cu
permiso, acepta of ofrece soborno y falsificacion di documentonan oficial di Gobierno. Den caso di
Juancho Filiciana, ainda e ta encarcela, a mande KIA mientrastanto den detencion preventivo pendiente
su caso