Page 81 - AVP

ORANJESTAD (AAN): Manera DIARIO a trece
dilanti caba, docentenan a haya sorpresa e siman aki cu nan salario a worde pasa,
siendo nan tin menos placa e luna aki.

DIARIO a menciona cu e suma aparentemente di 78 Florin a worde kita eroneomente di
docentenan, como ‘coreccion di NPR” di pensiun. Departamento di Finanzas a laga sa,
cu e coreccion aki di NPR no por ta mas cu 100 Florin.

Sinembargo, Sindicato SIMAR a mustra cu tin algun docente cu a haya como 1.000
Florin (algun hasta 1.200 Florin) menos riba nan salario e luna aki.

Durante un conferencia di prensa urgente teni Diaranzon atardi, Josephine Albertus di
Sindicato SIMAR a splica cu algo a bay malo den e booking di e coreccion. Y ora cu a
haya e payslip, asina a bin descubri cu tin varios toelage y overtime cu no a wordo
paga.

Esey ta e motibo pakico algun a haya menos riba nan salario. A contact Departamento
di Scolnan Publico (DPS) pero no ta haya contesta. E ora e directiva diario di Sindicato
SIMAR a acudi na DPS su oficina pa haya sa kico ta pasando.

Pa nan sorpresa, e “Staf Functionaris” no kier a baha bin abao pa papia cu e
Sindicalistanan. El a manda secretaria bay papia cu SIMAR pa bisa cu nan ta ‘bezig
cune’.

Como cu e Staf Functionaris no kier a enfrenta e Sindicato, a skirbi un carta unda a
duna DPS te cu 4:00 pm e deadline pa duna claridad riba e situacion, pues pakico e
docentenan no a haya nan toelage y overtime.