Page 25 - ARUBA BANK
P. 25
ORANJESTAD(AAN)– Na un forma continuo DIARIO a informa Pueblo di Aruba di e
problemanan serio cu ta presenta nan mes na mundo. E matutino di Aruba a bati
alarma cada rato cu mas informacion bini dilanti riba e situacion di economia mundial di
cual Aruba ta pertenece y pa cual Banco Central Aruba ta adverti atrobe den su relato
riba e desaroyo di economia na Aruba durante e ultimo trimester di 2018.
Un crisis mundial ta propaganda su mes pa basta dia y ayera e mercado di balor na
New York, a proclama crisis ora el a sufri un caida formal. Kico esaki ta encera DIARIO
ta splica den otro articulo pa asina Aruba comprende tur detaye di loke ta pasa
mundialmente.
DIARIO ta den contacto continuo cu expertonan cu ta mustra riba e impacto cu e
situacion cu a presenta Diaranson na nivel mundial tin pa Aruba.
Un recesion, caida economico severo, a wordo anuncia na mundo. Companianan
internacional a drenta den accion. Entre nan tin companianan riba tereno financiero y di
seguro por ehempel, cu ta directamente conecta cu Aruba.
No ta unicamente empresa, pero cualkier Arubiano por bira victima ora companianan
internacional den cual hasta companianan of seguronan di estado por perde placa ora e
companianan cu nan a inverti aden internacionalmente, sufri caida.
Venezuela ta duna prueba di e efecto di domino riba tereno di economia mundial,
manera na diferente ocasion DIARIO a trece dilanti y cu ta wordo treci dilanti tambe
den e rapport di Banco Central di Aruba.
E confrontacion economico entre Merca y China ta uno di e factornan cu ta afecta
economia mundial mescos incertidumbre cu varios sector mundial ta experencia.
Banco Central ta mustra riba posicionnan di e fondo monetario internacional IMF pero
tambe di Banco Mundial cu ademas a mustra riba miedo riba tereno internacional pa
haci inversion cu ta contene riesgo.
Aruba cu mester expande su economia mester tene cuenta cu e realidad mundial y
mester cuminsa informa Aruba debidamente.
