Page 16 - AIRLINES JAN 31

GROUND UN AVION

DCA ta e instancia oficial di gobierno cu por 'ground' un avion ora cu e ta sinti
cu e no ta sigur di su situacion di seguridad. Ora cu nan 'ground' un avion,
esaki ta nifica cu nan ta ordena e aeroliña respectivo pa tene e avion(nan)
tera te proximo aviso, esta cu nan no por permiti e avionnan aki pa lanta
buelo te proximo aviso. Nan ta avisa e aeroliña, cu na su turno, tin e
responsabilidad di actua. Ademas nan (DCA) ta informa nan coleganan na e
respectivo pais, pues den e caso aki e autoridad civil di aviacion na e
respectivo pais. Y si e avionnan ta registra na Aruba, nan (DCA) tin e
autorisacion pa por ground e avionnan unda cu nan ta ubica e momento ey.
Den e caso aki, mayoria di e avionnan tabata na Corsou ya cu nan tabata
efectuando buelonan pa e compania madre InselAir International. DCA por
'ground' un avion stranhero tambe, pero e ora e avion mester ta riba teritorio
local, esta di Aruba.

KICO PA HACI ORA CU UN AVION TA 'GEGROUND'

Kelly a splica cu ora cu un avion keda tera, (geground), ta na e aeroliña pa e
drecha e situacion. E mechaniconan certifica di e respectivo aeroliñanan tin
cu traha riba e fayonan, firma cu esaki a keda drecha y debolbe e
documentonan pa DCA controla. Nan, na nan turno ta confia e trabou, pero
tambe ta tira spotcheck pa wak si enberdad e cambionan ta haci. E ora nan ta
'release' e avion, esta kita e 'grounding' di e avion. E accionan cu e
mecaniconan ta tuma, ta varia di haci trabou fisico riba e avion, test flight e
avion y sigura cu e problema no ta presente mas riba e respectivo avion.
NOTA. E avion riba e portada no ta necesariamente e avion cu a wordo
'released'. Foto cortesia Jetphotos.net