Page 35 - ATA

Gerencia Di KvK A Confirma: Directora Di KvK A

Anuncia Su Retiro Den Forma Oficial – Martijn

Balkestein A Bira E Director Nobo

 Local
- 21/08/2019

Camara di Comercio y Industria Aruba (KvK) a confirma cu su Directora sra. Sonia
Velthuizen a tuma su retiro algun siman atras. E motibo ta pa rasonnan personal.

Sra. Velthuizen a dicidi cu despues di 8 aña na KvK di cua e ultimo 4 aña el a funciona
como Directora di KvK, e ta bay pa un reto nobo. Sra. Velthuizen a informa KvK di su
decision cu basta luna di aviso pa KvK por tin tempo pa apunta un Director nobo.

RETO NOBO DEN SECTOR PRIVA
Sra. Sonia Velthuizen lo continua su carera den sector priva. E no tabata un decision facil
pa sra. Velthuizen mirando cu den transcurso di e añanan cu el a traha na KvK, el a crece
y bira un persona hopi respeta y admira pa su maneho.

Como Directora di KvK e tabata semper na vanguardia di e empresario local y e ta yuda
trece sector priva y sector publico mas cerca otro pa bienestar di comercio di Aruba.

Tambe el a hisa e perfil internacional di KvK cu entre otro e organisacion di Kamers van
Koophandel di Caribe Hulandes, relacionnan productivo cu KvK di otro paisnan di
region y Merca, y tambe participacion na eventonan internacional cu a yuda trece
inovacion den KvK.

E coleganan y Directiva di KvK sigur ta desea sra. Velthuizen hopi exito y ta gradici
Sonia Velthuizen pa tur e experiencia y conocemento cu a comparti den e ultimo añanan.