Page 11 - MIN SOC

fantasia di hopi hende na pais desaroya.
Pero pa nos tur esaki, te cu recien, tabata hopi normal. Nos a permiti cu ta lora
nos manera cabrito manso den rij di spiral pa paga number di auto. Varios

biaha nos a pasa mita anochi dilanti DIMAS y su predecesornan pa ta sigur cu
nos lo haya un turno. Nos a core di loket pa loket den varios edificio pa cumpli

cu e tantisimo rekesitonan pa cuminsa un negoshi y nos a permiti cu ta
despacha nos atrobe cu otro excusa pasobra e papelnan necesario atrobe no a

keda cla despues di varios siman di retraso. Ademas nos a participa den e
bululu di eleccion pa vota contra e partido cu a comete desaster y pa duna ‘e

otro’ un chens atrobe. Pasobra mas pio e no por a bira. Pero den esey tambe
nos a keda kiboca. Y mayoria di biaha nos a acepta y a pensa: “OK, asina cos ta
bay kinan. E no ta cambia toch”.

Pero esey tambe ta e pregunta. Nos mester sigui pretende cu e manera aki
simplemente ta e norma y cu nos mester acepta sin mas locual ta ofrece nos?

Of poco poco nos por exigi mas y demanda ‘calidad pa nos placa’? Nos mester
ta simplemente agradeci pa locual gobierno ta ofrece nos of nos por ta critico

tambe pa cu esey, specialmente si resulta cu tin basta fayo den e maneho y su
ehecucion di parti di Gobierno mes. Nos mester sigui considera e patronahe

politico y e caos administrativo cu a causa asina hopi daño na nos isla como un
caracteristica inevitabel di gobernante incompetente y/of corupto? Of por fin nos
mester duna tur locual nos a siña acepta como consecuencia di e patronahe

politico y e mal maneho financiero como ‘normal’, e luga real, esta cu nos
‘normal’ en realidad ta hopi abnormal? Tanten cu nos keda considera lo

abnormal como ‘normal’ y nos ta keda satisfecho cu esey sin busca ningun
cambio , por lo pronto no lo tin ningun tipo di mehoracion. E ora ey nos mes ta

scohe concientemente pa nos comunidad sigui deteriora.