Page 23 - WEB

ORANJESTAD(AAN)– E hecho cu DIARIO continuamente a adverti pa e peliger grandi cu
Aruba ta confronta pa motibo di Citgo, ta pa motibo cu Citgo ta parti no solamente di

un cadena criminal cu ta bou investigacion mundial pero tambe ta baluarte di Rusia den
e expansion na Latino America. Pa comprende e importancia di Venezuela pa Rusia,
mester tene cuenta con Rusia a haci uzo di Venezuela como su baluarte pa expansion
comunista despues cu Union Sovietico a pasa pa historia.

Expansion tabata e meta grandi di Union Sovietico for di momento di su
introduccion. Lenin y Stalin tabata conoci pa e forsa bruto cu nan a uza na entrada di
comunismo.

Comunismo a avansa rond mundo, cu a wordo dividi den e guera friu di comunismo y
nacionnan liber. Na Europa e tabata visibel na un forma special na e muraya di Berlin,
cu trinta aña pasa, pues na 1989, a wordo tumba loke a haci posibel pa e poblacion

dividi di Alemania uni.

Presidente George H.W. Bush dia 31 di Juli 1991 a alcansa un strategia pa reduccion di
arma cu nan a firma na Moscu y a discuti e cooperacion economico den tempo di paz.

Na December 1991, e bandera di Union Sovietico a wordo baha y e bandera di Rusia a
subi.

Esaki tabata supone di bira un fin di e expansion comunista, cu mientrastanto a haya
un tera fertil na paisnan pober pero sigur den surgimento di dictadornan nobo cu tabata
reemplasa dictadornan existente.

Na Venezuela Hugo Chavez a surgi y na 1999 a sabi di bira Presidente di e pais, cu
tabata miembro fundado di OPEC.