Page 4 - MIN ON

Parlamentario Jeffrey Kelly: Ley di ortografia di Papiamento
a yega Parlamento di Aruba

Friday, 12 May 2017 08:35
Comparti

E landsverordening schrijfwijze Papiamento, o sea e ley di ortografia di Papiamento a yega Parlamento
fin di Maart. Parlamentario Kelly ta splica cu durante reunion di comision central, Parlamento di Aruba a
fiha un fecha pa entrega preguntanan pa loke ta regarda e ley aki.

Antayera tabata e ultimo dia pa entrega pregunta y awo Parlamento ta keda en espera di e contestanan di
parti di Gobierno riba e preguntanan cu a wordo haci pa siguientemente e presidente di Parlamento fiha
un fecha pa yama e reunion publico pa trata e ley. Papiamento a wordo introduci como vak den
enseñansa tempo di introduccion di ciclo basico na 2006 y un di e metanan principal di e ley aki ta pa
trece mas claridad den e ortografia di Papiamento y haci’e mas facil pa aplica. Historia di e desaroyo di
ortografia di Papiamento E ortografia cu nos conoce ta data di 1976 y p’esey ta bin cu cierto
adaptacionnan pa establece un ortografia nobo di Papiamento.

Na 1976 eilandsraad di Aruba e tempo ey a tuma e decision pa establece e ortografia di Papiamento. Na
1986 ora cu Aruba a drenta su Status Aparte e decision aki a wordo adopta via un Algemene
overgangsregeling wetgeving en bestuur como Landsverordening schrijfwijze Papiamentse taal. Na 1992
un comision a wordo apunta pa amplia e reglanan di ortografia di Papiamento y trece mas claridad y
simplicidad den e idioma Papiamento cu e meta final di trece uniformidad, o sea pa stimula tur hende pa
skirbi Papiamento usando e mesun ortografia. Tin biaha nos tin e tendencia di skirbi cierto palabranan
manera cu nos ta pronuncianan. Parlamentario Kelly ta mustra riba e importancia di skirbi y papia nos
Papiamento corectamente. Pa e motibonan aki ta necesario y importante pa bin cu e ley aki pa trece
uniformidad ora ta trata skirbi nos idioma.