Page 19 - MIN ARENDS

Jorge Velasquez y Sharon Bryson orguyoso di logro di
Gobierno pa habri Refineria

Sunday, 19 February 2017 17:26
Comparti

Diabierna mainta tabatin un ceremonia hopi special den e prome edificio riba tereno di e refineria cu a
keda renoba y for di unda por a cuminsa haci e preparacionnan pa entrega di material na e prome
trahado di contratistanan local cu ta cuminsa traha den e refineria San Nicolas.

E prome trahado pa ricibi su badge tabata Jorge Velasquez di Goedecke y e prome trahado femenino ta
Sharon Bryson di Oduber Contractors. Ambos tabata hopi contento y emociona cu e ceremonia cu a
marca e inicio oficial di e operacionnan den e refineria cu awor ta wordo maneha pa CITGO.

E ceremonia diabierna mainta a tuma luga den presencia di Prome Minister Mike Eman, Minister Mike
de Meza, encarga cu asuntonan di e refineria, y Minister di Labor Paul Croes, hunto cu ehecutivonan
local di CITGO.

Prome Minister Eman a haci entrega di e prome set di badgenan cual tabata na un grupo grandi di
empleado di Goedecke, specialisa den construccion den e sector, y Jorge Velasquez a ricibi e prome
badge for di man di e mandatario. “Mi ta sinti un alegria grandi y mi ta hopi orguyoso di e trabou cu e
Ministernan y henter e Gabinete Mike Eman a haci cu awe nos a logra cu un cantidad grandi di
trahadonan local a ricibi nan badge awe mainta pa por cuminsa traha den e refineria.” El a agrega cu e
hecho cu tin movecion atrobe den e refineria ta algo hopi importante pa e trahadonan, principalmente
esnan cu a yega di traha eyden caba, pero tambe pa economia di Aruba.

Goedecke, el a splica, ta un compania cu hopi aña operando den e refineria haciendo trabou den
“insulation”. Y e mes tin hopi experencia den e ramo aki tambe.

Sharon Bryson, e prome hende muhe pa ricibi su badge pa por traha den e refineria di CITGO, ta traha cu
Oduber Contractors, un contractista cu pa hopi aña a traha den e refineria y cu despues di e ciere a keda
labora eyden. Sra. Bryson ta ocupa e funcion di “Head Timekeeper” pero tambe ta yuda cu payroll y
administracion. “Cu mi a ricibi e prome badge ta laga'mi sinti hopi bon. Mi tin hopi aña laborando aki
den y ta hopi importante e trabou cu a wordo haci pa nos sigui aki den, treciendo trabou pa hopi hende.”
Bryson a splica cu e movecionnan den e refineria ta haci'e hopi contento. “Mi t’asina contento cu mi no
por splica'bo con hopi. E ta algo cu mi a spera si, despues di a mira con duro Minister Mike de Meza
tabata traha mi tabatin tur confiansa den e re-apertura,” el a enfatisa.