Page 29 - KPA

Setar ta acusa Yvan y Debby Koolman di malversacion
miyonario

Tuesday, 21 March 2017 08:24
Comparti

Egbert Koolman tabata traha na Setar te aña pasa, despues cu a kit'e for di trabou acusa di a malversa
miyones di nos compania nacional. E no a haci esaki su so, sino a haya ayudo di su ex casa Evarina
Xiomara "Debby" Koolman, cu tabata traha na Banco Central di Aruba y cu tambe a perde trabou fin di
aña.

Y riba dje ta sospecha amante di Koolman, Aiza Croes, cu tambe lo a forma parti di e estafa aki. E corant
Miami Herald a informa di e caso "secreto" aki pasobra na Aruba mes Setar no a haci ningun mencion di
dje. Awo cu a entama e caso contra Koolman na Merca, cu prensa Mericano a haya sa. Parce cu e ultimo
10 añanan, Egbert Koolman tabata encarga pa cumpra celular pa Setar for di rond mundo. Nunca e
compania por a imagina cu el a lanta yen compania offshore den Caribe y cu cuenta di banco na Panama
den cual e companianan di bende celular tabata mande "kickback" di mas o menos 20% riba cada
compra. E ultimo decada aki Setar a cumpra miyones na celular pa cual ta sospecha cu e empleado aki a
logra enrikese su mes cu miyones di florin. Asina e tabata pidi 3 oferta, tur di su mesun companianan y
asina di forma strategico a keda influencia prijs di celular na Setar. Pero e berdad a sali na cla ora cu e
Panama Papers a lek. Ey a bin sali nomber di Egbert Koolman, locual a pone cu su superiornan a bay
cuestiona con por ta posibel cu ta meti den e escandalo ey y cu e tin cuenta di banco scondi na Panama,
etc. El a duna diferente version na diferente superior, pa cual a dicidi di kit'e for di trabou. Pero su tras a
sigui un investigacion riguroso cu a crusa frontera di Aruba y a bay te Merca. Un compania forensico a
conduci e investigacion na Aruba, mientras cu Delloite a investiga cifranan y proceduranan. Na final di e
investigacion interno, a entrega keho na Ministerio Publico, pero nan no a mira nada den e caso.

Pa confirma e sospechonan mas ainda, ora cu a kita Egbert Koolman di trabou, el a bay biba mesora na
Merca. Ta pesey Setar a busca un bufete di abogado di Merca pa entama un caso contra dje eynan y pa
haya e placa malversa y pa e paga pa e daño cu el a causa Setar, calcula na decenas di miyon. De facto, pa
su culpa celular ta costa mucho mas caro na Setar pasobra e tabata hisa e tarifanan pa enrikese su mes! E
so no, e tabata uza su ex casa y su amante cu tambe tabata beneficia di e fondonan malversa. Ta papia di
entre otro biahenan di placer pa rond mundo, drecha cas, traha piscina, muebla cas na grandi, cumpra
auto pa yiu y hopi mas. Ta hasta sospech'e di ta paga scol pa un yiu (di amiga) studia den exterior, di
acuerdo cu e investigacion preliminar. E corant Miamia Herald a busca contacto cu algun di e
companianan di bende celular cu ta acusa den e caso entrega na Corte di Merca, pero nan ta nenga
rotundamente di a duna Koolman placa bou man. Nan ta sigura cu a haci negoshi cu Setar sin nunca a
paga nada na ningun empleado. Setar sinembargo ta "sue" tur awor den Corte na Merca. Mester
menciona cu Merca desde cu documentonan a lek na Panama, ta duna masha atencion na e tipo di
casonan comercial asina, den cual companianan of ehecutivonan ta haci tur sorto di maniobra pa evadi
impuesto of pa laba placa. Fecha ki dia e caso ta tuma luga no ta conoci ainda. Setar mes no a duna
ningun comentario ainda riba e noticia cu a aparece awe den prensa Mericano.