Page 25 - MIN JUS

Dialuna den oranan di merdia tabatin un ceremonia riba Welcome Plasa pa entrega di e
edificionan nobo cu a worde construi pa ubica e kiosconan cu ta bende producto cu
turistanan. Tabata presente Prome Minister Mike Eman, Minister Benny Sevinger y
Minister Arthur Dowers di parti di Gabinete Mike Eman II y di Parlamento tabata

presente Lorna Varlack y Clariska Velasquez.

Ademas por a nota presencia di director di DOW ing. Marlon Croes, representante di
FDA, cu a financia e proyecto y miembronan di InfraTeam.

“E dia di awe pa nos ta uno special. Special den e contexto cu un otro parti di e vision
pa renoba nos isla y renoba nos centronan di ciudad, bario- y schoolnan, a bira
realidad. Tabata un vision grandi cu nos a pone nos dilanti algun aña pasa na momento

cu nos tabata den oposicion y nos tabata mira nos isla deteriora. Edificionan tabata cay
den otro, centronan di ciudad y barionan tabata cay den otro, schoolnan tabata cay den
otro y poder di compra tabata worde afecta.”

A base di e situacion aki cu partido di actual Prome Minister Eman a mira ora cu e
tabata den oposicion, a traha riba un vision grandi pa trece un cambio pa Aruba. E
cambio a keda ilustra den tur e facetanan di e Programa di Gobernacion cu e dos
Gabinetenan lidera pa Prome Minister Eman a presente pa worde ehecuta.

Ta papia di aspectonan fisico, social y economico. “Poco poco a pone e vision aki den
henter e maneho di gobierno pa renoba bario y schoolnan, crea espacionan publico,
canchanan deportivo den e barionan.

Desaroyo di e proyecto di un sede nobo y moderno pa e kiosconan ta forma parti di e
vision grandi di Gabinete Mike Eman unda cu e empresarionan chikito aki ta brinda nan
servicio for di un sede di 5 strea. Edificio moderno, cu baño pa e usuarionan, un baño

special pa personanan den rolstoel y un W-Fi Tree cu ta brinda servicio di internet
eyriba.

Na final Prome Minister Eman a bishita e empresarionan na nan actual sede pa informa

nan cu den un luna di tempo nan ta den nan sede nobo.