Page 51 - MIN VOS

FCCA hunto cu gobierno a pone prome piedra na proyecto na
Kunuku Abou Construccion di 18 vivienda pa nos grandinan

Wednesday, 07 December 2016 20:58
Comparti

Na Kunuku Abou e ceremonia di ponemento di prome piedra a tuma lugar pa construccion di 18
seniorenwoning. Un proyecto di FCCA y gobierno.

Presente tabata Ministernan Eman y Sevinger, director di FCCA van Poppel, ehecutivonan di FCCA, e
senioren comite y contratista Calidad cu e gana e bidding. E ceremonia tabata mas tanto algo oficial
ya cu trabou na e sitio a cuminsa caba y ta den full swing. E lugar ta sereno, trankil y den e cas
principal tin un piscina pa e futuro habitantenan por relaha den un dushi ambiente.

Prome Minister Eman a reconoce presencia di e seniorencomite cu ta consisti di Adelaida Arends-
Ponson, Marvel Bermudez y Ingrid Odor. Nan tey pa cuida e interes di e grandinan cu ta bay biba na e
casnan di Kunuku Abou. Eman a bisa cu algun siman pasa nan tabata na Kiviti unda a pone e prome
piedra pa un bunita proyecto di FCCA, siman pasa na Savaneta otro proyecto di FCCA y awor na Kunuku
Abou unda ta inicia vivienda pa e grandinan. "FCCA den colaboracion cu nos gobierno y specialmente
Minister Sevinger ta pone prioridad riba calidad di bida di nos hendenan pa percura pa den tur sentido
e acomodacionnan cu nos hendenan ta busca tanto den vivienda, como tambe den e ambiente rond di
nos casnan ta bon. Cu e renobacion y infrastructura di nos barionan ta percura pa un miho calidad di
bida."

Un preocupacion cu tin y a wordo vocifera na e sitio ta e asunto di inundacion ora tin awacero pisa.
Eman ta haya esaki un preocupacion legitimo, pasobra no ta hende ta bin conte, pero e mes semper ta
pasa den e barionan cu tin problema cu inundacion y sa con e situacion por bira. Eman a bisa cu na
unda e viviendanan ta bin na Kunuku Abou tin dos gulido cu ta funciona y esey ta percura cu e awa ta
baha masha lihe. "E casnan ta wordo construi riba un haltura di 30 cm cu segun e ultimo midinan
despues di e awacero pisa, ta riba e nivel cu por haya despues di yobidanan fuerte. Esaki ta un alivio.
Mi ta contento di tende di e arkitecto, di FCCA y e constructor cu cuenta a wordo teni cu e situacion di
inundacion." Den un tono humoristico, pero cu un mensahe cla Eman a bisa "Mi ta bin bek cerca FCCA y
Calidad si mi mester haya mi mes ta cana den un meter di awa aki nan. Nan a bisa mi pa no preocupa,
pasobra nan a haci e midimentonan corecto."