Page 5 - MIN ON

Alumnonan Di EPB Oranjestad A Disfruta Di E

Presentacion Cu Tabatin Como Tema Olimpismo Y E

Weganan Olimpico

 Local
- 28/05/2017

Durante dos dia, Secretaria General di COA, sra. Nicole Hoevertsz tabata di
bishita na e scol secundario, EPB Oranjestad p’asina comparti informacion cu e
alumnonan, unda a haci nan mas consciente di e historia di Weganan Olimpico.
A conta e alumnonan pakico deporte ta un materia asina importante y kico
realmente ta nifica participa como atleta na Weganan Olimpico.

Den e cuadro di lesnan informativo p’e alumnonan sra. Hoevertsz a wordo invita
pa bin duna un lectura rib’e tema tan importante aki, cual hopi di nos muchanan
hoben ta aspira un dia pa yega. Mas cu claro e presentacion no por a bay sin e
materialnan di muestra, manera e. o. e uniform di e delegacion Arubano, pins,
posternan Olimpico, medaya, bukinan, e mascotanan di e diferente weganan, y e
replica di e famoso antorchanan cu ta uza tradicionalmente pa inaugura e
Weganan Olimpico.Na final e alumnonan a haya e presentacion hopi interesante
y a haci un cantidad di pregunta na sra. Hoevertsz. Mester bisa cu e alumnonan
tabata masha interesa den e topico mientras e mayoria ta practica deporte y
algun hasta ta afilia na un of mas organisacion deportivo na Aruba. Mas cu claro
e alumnonan a tuma tempo pa saca algun foto cu sra. Hoevertsz y tambe cu e
materialnan Olimpico.Comite Olimpico Arubano kier a gradici EPB Oranjestad y
muy en especial docente Hellen Wilemsen-Leijdekkers pa e oportunidad brinda.