Page 48 - MIN ON

ORANJESTAD, Aruba

Durante e siguiente 3 añanan aki, Minister di Enseñansa di Aruba, Departamento di Enseñansa,
Dienst Publieke Scholen y Centro pa Innovacion y Guia Educacional (SIGE) di Corsou lo traha
di cerca cu otro, basa riba e acuerdo di cooperacion cu a firma recientemente, den cual ta stipula
cu lo traha riba diferente meta di interes comun pa medio di intercambio di informacion y
conocemento. E intencion ta, segun coordinado di e centro di Corsou ta splica, pa logra inclui
Boneiro tambe den e acuerdo aki.

Meta di e acuerdo di cooperacion aki ta pa traha hunto riba diferente area di Enseñansa,
cuminsando cu un enfoke ariba Arbeidsgericht Onderwijs (AGO) na Corsou y Scolnan Practico
di Ofishi (SPO) na Aruba. E prome proyecto ta encera un plataforma digital online caminda
docentenan trahando cu alumnonan cu necesidad special den educacion na un forma
collaborativo ta traha hunto intercambiando informacion riba miho practicanan den klas, material
y ta consulta otro den un setting profesional colegial. E plataforma digital aki lo fungi tambe
como base di intercambio pa diferente investigacion riba nivel micro y meso cu lo tuma luga den
e 3 añanan venidero riba e tipo di enseñansa cu ta wordo duna na AGO y SPO. E meta principal
di e investigacionnan aki ta pa halsa e calidad di enseñansa y educacion door di traha mas
‘evidence based’ y coherente e necesidadnan actual di nos hobennan pa cu nan desaroyo personal
y laboral. Resultadonan di e investigacionnan simultaneo lo keda presenta durante un
conferencia anual, cual e aña aki lo tuma luga pa prome biaha na Corsou den luna di september.

Solange Olaria, di SIGE ta splica cu na e islanan nos ta papia e mesun idioma, nos tin e mesun
retonan y metanan comun pa cu e desaroyo di nos hobennan. Door di esaki ta explorando kico
cada isla por siña di e otro y coopera den desaroyonan hunto. SIGE ta traha na bienestar di
hobennan entre 0 pa 24 aña di edad den tur faceta di nan bida. E colaboracion entre SIGE y
Aruba ta concentra entre otro riba desaroyo di profesionalnan, educadonan y mayornan cu tin
necesidad di sigui desaroya nan habilidadnan y competencianan den con pa anda cu e hobennan
di awendia, asina Solange Olaria a agrega.

Minister di Enseñansa, Michelle Hooyboer-Winklaar, ta reconoce e balor agrega di e acuerdo aki
pa e bienestar di nos futuro generacionnan y e desaroyo continuo di esunnan liderando, guiando
y fortaleciendo nos futuro generacionnan; nos educadornan. E similaridadnan den e.o. contexto
lo fungi como base solido pa traha hunto ariba retonan y metanan cu nos islanan tin en comun y
alabes crea un sin fin di posibilidadnan pa sigui stimula collaboracionnan sostenibel den nos
Enseñansa.