Page 31 - MIN ECEM 11 MAY 2017

A.T.A. ta contento di por a patrocina e prome edicion na
Aruba y den Caribe di Torneo di Golf pa hende cu limitacion

fisico

Wednesday, 10 May 2017 18:35
Comparti

Aruba Tourism Authority (A.T.A.) a organisa e prome edicion di Disabled Golf Tournament (DGT),
caminda un grupo di persona cu limitacion fisico por a competi den e prome torneo di golf na Aruba.
Alabes nan a haya e oportunidad pa disfruta di nos isla.

Nos destinacion ta e prome isla den Caribe cu ta ofrece hungadonan di golf cu limitacion fisico e
posibilidad di haci uzo di un handicart, tambe conoci como un ParaGolfer cu ta situa na Tierra del Sol.
A.T.A. a forma un asociacion cu e organisacion BMVG (Betouwe Minder Valide Golf), cu ta un
organisacion na Hulanda specialisa pa brinda personanan cu limitacion fisico e oportunidad pa hunga
golf. Ademas, miembronan di Aruba Paralympic Committee a haya un oportunidad unico pa participa
den e torneo aki. Presidente di e Committee Drs. Shardea Croes a keda masha encanta cu e tipo di
actividad aki, na unda no solamente a brinda oportunidad pa esnan cu limitacion fisico por a hunga golf,
pero tambe e lazonan cu a wordo crea entre e Comite Paralimpico di Hulanda y esun di Aruba. Esaki
sigur ta un primicia den Caribe y ta posiciona Aruba den e mundo di golf na un manera diferente. E
programa di e DGT 2017 a ofrece e grupo cu a bishita Aruba experiencianan unico rond di nos isla. E
torneo di golf a tuma luga riba canchanan di Tierra del Sol y Divi Links.

Tambe nan a bishita nos playanan y a experiencia handicapped diving. Naturalmente durante nan
estadia e grupo a haya un experiencia culinario cu Aruba so por ofrece. Miembro di e organisacion
BMVG, señor Mark Tempelman ta contento di por mira e realisacion di e plan aki y ta premira un
asociacion fructifero cu A.T.A. den ParaGolf. CEO di A.T.A. Ronella Tjin-Asjoe- Croes ta remarca cu e
tipo di esfuersonan aki di parti di A.T.A. ta laga Aruba destaca y ta yuda posiciona Aruba den e mundo di
golf, mas cu claro ta mustra tambe cu esnan cu limitacion fisico por bishita trankilamente y hunga golf
aki na Aruba. Un danki ta bay na Tierra del Sol y Divi Links pa aporta na e evento aki, como tambe na tur
e participante local cu di un of otro manera a yuda pa e torneo aki a bira uno exitoso.