Page 33 - MIN ARENDS

Dialuna mainta: Minister Angel Bermudez a wordo invita pa
bin Parlamento pa tratamento di presupuesto supletorio

2016

Saturday, 17 December 2016 22:37
Comparti

Tabata tin reunion den Parlamento pa atende e presupuesto supletorio. Minister Angel Bermudez a
splica cu el a haya invitacion di griffier di Parlamento
cu a wordo stipula otro siman dialuna cu lo cuminsa cu tratamento di e presupuesto supletorio pa 2016.
Esey ta un concepto di ley caminda cu ta sincronisa e presupuesto 2016. Durante ehecucion semper tin
cierto desaroyonan. Tin cierto cambionan dentro di e presupuesto y esey tin cu wordo formalisa por
medio di un supletorio. Tambe e ora ey lo inclui e efectonan cu e rehabilitacion di e refineria a trece cun’e
desde October di e aña aki. Esey ta loke tin den e concepto ey y lo wordo trata otro siman dialuna den
Parlamento. Tin di compronde cu segun e carta di invitacion ta bisa cu riba agenda tambe ta trata e
cuenta anual di 2015. Esey tambe e ora ey durante e reunion ey lo wordo discuti y pa despues haya su
aprobacion.

Segun Minister Bermudez, no tin ningun buraco. E presupuesto supletorio ta mantene e presupuesto
2016 den su cuadro financiero cu tin cu resulta den un deficit, manera e ley di LAFT ta stipula pa e aña
aki cu ta 2%. Esey tin cu mantene nos mes aden. Ta wak tur aña e cambionan dentro di e presupuesto,
caminda cu cierto categorianan ta cambia di un pa otro. Esey ta loke basicamente pa un gran parti e
supletorio aki ta eherce y ta esey ta su funcion.
Refineria

Valero a dispidi for di nos pais y el a cumpli cu tur loke e tabata tin habri pa loke ta su obligacionnan di
impuesto y na Douane. El a transferi un suma di 24 pa 26 miyon pa e dos departamentonan aki. Na e
mesun momento Citgo a bay den un convenio cu e compania nacional Refineria di Aruba, a base di cual e
tin cu cumpli mensualmente cu cierto pagonan, tambe ta cumpliendo manera pago di lease pa e
refineria, y tur eseynan ta canando y tin efectonan cu mester a inclui ainda den e presupuesto 2016, ora
cu a trece e presupuesto na inicio di e aña aki. No tabata na altura ainda di e impacto aki cu e
rehabilitacion lo a trece cun’e riba nos situacion financiero di pais Aruba.

Awo a hinca un parti di e refineria den e presupuesto. E efectonan ey a bay aden y pa otro aña e
efectonan ey a wordo inclui caba den e presupuesto 2017 cu recientemente a wordo discuti, trata y
aproba den Parlamento, segun minister Bermudez.