Page 4 - UNOCA

PROYECTONAN COFINANCIA DEN 2016
Den 2016 UNOCA a cofinancia 57 proyecto cu a wordo ehecuta den diferente districto di nos isla. Den 2016 tin un
cresemento di 24% den proyectonan aproba compara cu aña 2015. Como parti di e proyectonan aproba den 2016 a
ofrece 29 workshops habri pa comunidad den diferente plataforma artistico manera teatro, baile, diseño grafico,
poesia, musica, moda, arte visual y historia di arte tanto pa mucha, hoben y adulto. Esaki cu e mision di crea
participacion activo den arte y cultura di henter e comunidad di ARUBA. Den 2016 UNOCA a duna 3 artista local e
oportunidad pa sigui curso den exterior pa forma nan talento den e area di arte performativo, musica y instalacionan
di arte, como tambe teatro y arte manual, enfocando riba educacion di nos artistanan local y elevacion di e nivel y
producto cultural di Aruba. Proyectonan cofinancia a genera 44 evento incluyendo presentacionan, festivalnan,
shows y exposicionan cultural y artisico unda nos comunidad a haya e oportunidad di mustra nan talento y expresa
nan mes artisticamente. Por mira un resumen di tur proyecto subsidia den 2016 y e diciplina artistico cu nan ta
representa riba www.unocaruba.org. Pa mas informacion di e proyectonan aki por yama libremente na oficina di
UNOCA. Adicional na proyectonan cofinancia, UNOCA a tuma e iniciativa pa organisa un workshop empresarial
yama Creando un Futuro Creativo, unda profecionalnan den diferente ramo a comparti informacion balioso cu
entrepreneurnan cultural.

2017
Den 2017 UNOCA lo sigui enfoca riba responsabilidad, inovacion, professionalismo, balans y colaboracion. Esencial
den esaki ta pa continua democratisacion di nos fondo cultural cu enfoke riba entre otro, stimulacion di talento nobo
y reconocimiento di experencia di nos baluartenan cultural.

UNOCA su portanan ta habri pa tur individuo interesa den participa activamente den e desaroyo di nos cultura, por
haci un sita of yama libremente na 5835681 pa mas informacion.

Directiva y personal di UNOCA kier a desea henter e comunidad di Aruba feliz dianan di fiesta y un prospero aña
nobo. Tambe ta informa cu en conexion cu dianan festivo UNOCA lo ta sera desde 19 di December, 2016 te cu 3 di
Januari 2017 y lo ta habri pa publico bek dia 4 di Januari. Pa mas informacion di UNOCA of actividadnan artistico y
cultural na Aruba por bishita unocaruba.org, UNOCA ARUBA riba Facebook of @UNOCA riba Instagram.