Page 11 - CITGO

CITGO ta cumpliendo cu su obligacionnan desde october
2016

Tuesday, 17 January 2017 18:18
Comparti

Minister Mike de Meza a confirma den un conferencia di prensa dialuna ultimo cu CITGO ta cumpli cu
su obligacionnan financiero pa cu Gobierno desde october 2016. Entre otro parti di e 20 miyon florin cu
ta un obligacion riba base anual. E mandatario tabata hopi amplio den su splicacion pa loke ta refineria
CITGO.

Den e acuerdo cera cu CITGO a keda palabra un suma di casi 20 miyon florin cu e multinacional
mesterpaga anualmente na belasting. Den e caso aki, CITGO for di luna di October ta cumpliendo cu e
pagonan aki na pais Aruba. De Meza a splica cu a haci un palabracion unda cu tur luna CITGO mester
paga un suma di placa. Esaki ta encera un parti di winstbelasting como tambe grondbelasting. E suma
aki mester wordo paga sea e refineria ta den operacion of no. Minister de Meza a splica cu tin un otro
suma mas cu CITGO mester paga cu ta 20 miyon florin pa “lease”di e refineria. Esaki ta wordo paga na
RDA (Refineria di Aruba) cu ta un compania estatal. “For di october esaki tambe ta wordo cumpli
cabalmente cune, sea e refineria ta den operacion of no. E contribucion cu tin unabes cu cuminsa cu e
actividadnan laboral, tambe tin su efecto pa economia di Aruba. Entrada di personal di e refineria lo
move den e economia. Nan contribucion cu loonbelasting y esun di winstbelasting di e companianan
tambe lo ta un contribucion den caha di pais Aruba.” Aruba, den cuadro di presencia di e refineria, a haci
su pronosticonan den e presupuesto.

E mandatario a bisa cu Gobierno ta cumpliendo cabalmente cu e presupuesto di e ultimo dos añanan y ta
cumpli cu e pronosticonan. A base di evaluacion haci, e aña’ki lo yega na e piek cu 2500 persona
trahando den e refineria, y a sigura cu cifranan cu a usa semper ta relativamente conservador. Tambe
Minister de Meza a splica cu na ningun momento e refineria di Aruba ta na peligro, ya cu e compania
CITGO of PDVSA nunca por pone e refineria como borg pa nan prestamonan. Esaki no por tuma luga sin
autorisacion di pais Aruba, y di e forma aki e mandatario a desbarata preocupacionnan cu a wordo
expresa door di opositornan. Aruba durante e negociacion a pidi cierto garantianan y den e parti di e
refineria ta pone specificamente cu no por usa e refineria na ningun momento como un garantia sin
aprobacion di pais Aruba.