Page 12 - CITGO

Minister de Meza a splica di e trabounan den CITGO
"Trahadornan y companianan local ta en promenan pa haya

trabou"

Tuesday, 17 January 2017 18:18
Comparti

Minister de Meza a tene hunto cu su colega Minister Arends un conferencia di prensa riba CITGO pa
splica kico tur a tuma lugar y kico ta tumando lugar. Hopi punto interesante a wordo treci dilanti.
Minister de Meza cuminsa e conferencia splicando cu na luna di October CITGO a tuma e refineria over
di Valero.

"Esaki ta apenas tres luna y mey pasa y ya caba un cantidad grandi di hende a wordo entrevista pa
cuminsa traha den e refineria. Den un futuro cercano nos lo presenta e cantidad exacto di hende cu a
wordo contrata caba pa loke nan ta yama e 'scope definition'. Esaki ta encera defini e diferente trabounan
y e partinan di inspeccion cu tin cu tuma lugar. Tambe prepara e paketenan cu ta wordo yama e 'pre
rehabilitation fase'." De Meza a bisa cu una bes esaki tuma lugar e trabounan grandi mes cu ta cuminsa y
mas hende por cuminsa traha. "E prome parti ta canando bon y den bon speed. Pronto por mira hopi
actividad cu ta bay tuma lugar. Gobierno di Aruba ta keda insisti pa e trabounan cuminsa mas lihe
posibel, pasobra nos sa cu tin hopi local ta wardando pa e fase ey cuminsa pa asina nan por cuminsa
traha den e refineria. Mi kier enfatisa un bes mas cu trahadornan y companianan local ta e promenan pa
haya trabou. Aruba tin un base limita di personanan cu a yega di traha den e refineria. Nos a analisa
esaki y nan ta entre 800 y 1300 hende." De Meza ta consciente cu na cierto momento den piek di e
rehabilitacion lo mester di entre 2500 y tres mil hende. Esaki ta nifica cu ta bay tin suficiente trabou pa
esnan interesa y sigur cu tin experiencia den refineria, pero tambe pa esnan cu a caba scol tecnico.

Tambe ta bay tin trabou pa hobennan di Aruba cu kier bin bek y traha como ingeniero of tecniconan den
e refineria. Ta yega un momento cu lo mester importa hende di afo durante un periodo defini. E
trabounan cu mester wordo haci pa e refineria por opera ta dura entre dos pa cuatro aña. E trabounan
mester wordo haci na un manera sigur pa loke ta e personanan cu ta traha eyden, sigur pa e becindario y
sigur tambe pa ora e refineria bay den operacion cu e planta ta bon rehabilita cu e operacion por sigui. De
Meza a splica tambe cu un refineria ta cay den e rango di industria pisa, esta petroquimico cu ta un
industria masha delicado. "Pesey ta bay tin hopi training pa e empleadonan. RDA ( Refineria di Aruba) ta
den e circulo di contactonan aki. E tin den servicio expertonan cu hopi aña di experiencia di trabou den e
industria aki. Nan ta bay ofrece paketenan di om- y bijscholing pa e trahadornan cu tin ya tin algun aña
pafo di e refineria. Esnan cu ta bin di pafo tambe mester pasa door di e procesonan aki. E ta algo cu ta
necesario.